مسلمانوں کا طرزِ زندگی

ساتویں صدی کے اوائل میں خطۂ عرب میں ایک تہذیب منصۂ شہود پر نمودار ہوئی اور ارتقاء و نمو کی منازل طے کرتی ہوئی حیرت انگیز طور پر قلیل مدت میں جزیرہ نما عرب کے تمام قبائل میں متعارف ہوکر انہیں کو اپنے اندر جذب کرکے منظم ومتحد کرلیا اور پھر خطّۂ عرب کی حدوں کو پار کرکے آس پاس کے علاقوں کے ساتھ اپنے سیاسی و معاشرتی رشتوں کو استوار کرلیا۔اس طرح ترقی و عروج کا سفر طے کرتے ہوئے نمو کی تیسری صدی تک یہ تہذیب تاریخ ِ عالم کی شانداراور باکمال قوت بن گئی۔ اس کی تہذیب کی تخلیق، نمو اور ارتقاء نے تاریخ کے دھارے کا رخ یکسر تبدیل کرکے انسانی تہذیبی ورثے کو نہ صرف تقویت بخشی بلکہ اس کی آرائش و افزودگی میں کلیدی کردارادا کیا۔

اس تہذیب کو اسلامی تہذیب کے نام سے موسوم کیا گیا کیونکہ اس کی بنیاد دین اسلام پر رکھی گئی تھی۔ اسلام دین فطرت ہے اور اس کے اساسی تصورات عدل واعتدال پر مبنی ہیں۔ یہ وہ عظیم نعمت ہے جو انسانیت کو ایک عظیم تحفہ کے طور پر اللہ تعالیٰ کی طرف سے عطا ہوئی ہے۔ اسلام انسانی حیات کے ہر گوشے کا احاطہ کرتا ہےاور یہ واحد دین ہے جو دیگر ادیان باطلہ اور دوسرے افکار سے کلی طور پر منفرد بھی ہے اور مختلف بھی۔ یہ ایک ایسا نظام ہے جو ایک صورت میں بندے کو اپنے خالق سے ملاتا ہے تو دوسری صورت میں اسی مخلوق کا رشتہ بندگانِ خدا سے بھی استوار کرتا ہے۔ جس طرح عمل کے بغیر علم کا ہونا اور انسانیت کے بغیر انسانوں کا ہونا، ایک ادھورا عمل ہے اسی طرح حسنِ اخلاق، خدمت خلق اور صلہ رحمی کے بغیر مسلمان ومؤمن بھی ادھورا ہے۔

دینِ اسلام ایسا مذہب ہے جو مذہبی، روحانی، سیاسی، معاشی، قانونی اور معاشرتی نظریات کا ایک مربوط اور منظم مجموعہ ہے جو معاشرتی، سماجی زندگی کے تمام پہلوؤں میں بھرپور رہنمائی فراہم کرتا ہے۔ قرآنی تعلیمات انسان کو حدود میں مقید رکھنے اور حد سے متجاوز نہ ہونے کی ترغیب دیتی ہیں اور ساتھ ہی روز مرہ کی زندگی کے تمام پہلوؤں میں ہدایات مہیا کرتی ہیں۔ اللہ پر ایمان ایک مسلمان کو اپنے رب کا مطیع و فرمانبردار بندہ بننےکے ساتھ معاشرتی معاملات میں مثبت کردار ادا کرنے کی بھی تعلیمات فراہم کرتا ہے ۔لہٰذا یہ کہنا بجا ہوگا کہ دین اسلام اخلاقی و سماجی نظام کا ایک مضبوط احساس پیدا کرتا ہے جہاں ہمہ وقت بااثر سماجی قوت معاشرتی حدود وقیود کے نفاذ کے لیے موجود ہوتی ہے جو معاشرتی ناہمواری کو ہموار اور مجرمین کو نیکوکار بنانے کا سبب بنتی ہیں۔¹

اسلامی نظام ایک ایسا معاشرہ تعمیر کرنے میں رہنمائی فراہم کرتا ہے جس میں ہر شے سے متعلق ہدایات فراہم کی گئی ہیں اور عقلی واستدلالی امور میں ترقی کی راہیں ہموار کی گئی ہیں۔اسلام نے معاشرے کو نسل ،رنگ ، زبان ،ملک اورعلاقائی و قومی مفادات پر مبنی کم درجے کی شراکتوں اور تعلقات کے برعکس صرف عقیدے کی شراکت اور تعلق پر قائم رکھاہے۔ انسان اور جانور دونوں میں باہم مشترک خصلتوں پر زور دینے کے بجائے اسلام ان خصوصیات کو فروغ دینے پر زور دیتا ہے جو ہر انسانی ذہن میں موجود ہیں۔ دراصل یہ ماحول ہی ہے جس میں انسان پرورش پاتا ہےاوراپنے اعتقادات اور خصلتوں کی تشکیل کرتاہے۔ اسلام ان کی پرورش کرکےغالب عنصر بنا دیتا ہے اور انسان کو انسانیت پسندی کی جانب موڑ دیتا ہے۔اس طرز عمل کے شاندار نتائج یہ سامنے آئےکہ اسلامی معاشرہ کشادگی کو اپنے اندر سمونے کا مظہر بن گیا جہاں مختلف نسلوں، قوموں، زبانوں اور رنگوں کے افراد بغیر کسی تنگی و پریشانی کے اس معاشرے کا حصہ بن گئے اور ان کے مزاج میں موجود رذیل و حیوانی خصائص خیر سے بدل دئیے گئے۔

اسلامی معاشرے میں عربی، فارسی، شامی، مصری، ترک، چینی، ہندوستانی، رومی، یونانی اورافریقی نسلوں اور قومیتوں کے افراد ایک ساتھ موجودتھے۔ مختصر یہ کہ اسلامی معاشرہ تمام قوموں اور نسلوں پر مشتمل ایک ایساسماجی نظام تھا جس کے افراد اخوت و بھائی چارےکے رشتے میں باہم مربوط تھے۔ ابتدائی دور میں دیکھا جائے تو اُس وقت کے کثیر النسل افراد کی مختلف خصوصیات باہم مشترک تھیں اور انہوں نے آپس میں باہمی تعاون، ہم آہنگی اور اتحاد کے ساتھ اسلامی برادری اور اسلامی ثقافت کی تعمیروتشکیل میں بڑھ چڑھ کر حصہ لیاتھا۔²

نظامِ تقویم

قبل از اسلام عرب میں وقت کی پیمائش کے لیےمختلف نظام رائج تھے۔ کچھ جنتریاں قمری تھیں جبکہ دوسری چاند اور سورج کے باہمی تعلق پر مبنی جنتریاں(Lunisolar Calendar) تھیں جو چاند کی گردش کے مختلف مراحل(phases) پر مبنی مہینوں کا تعین کرتی تھیں لیکن موسموں کے ساتھ جنتری کو ہم آہنگ کرنے اور مطابقت پیدا کرنے کے لیے قمری چکر کےعلاوہ تقویم میں مزیددن منسلک کیے جاتے تھے۔

ہجری تقویم کا آغاز حضرت عمر کیا جو دوسرے خلیفۂ راشد تھے۔³ یہ عمل صحابۂ کرام سے تفصیلی مشاورت اور غور و خوض کے بعد طے کیا گیا تھا۔ رسول اللہﷺ اور آپﷺ کے اصحاب کی مکّہ مکّرمہ سے مدینہ منوّرہ ہجرت کے واقعے کو نئی تقویم کے نقطۂ آغاز کے طور پر منتخب کیا گیا تھا۔ جنتری کی ابتداء کے لیے ایک تاریخ منتخب کی گئی جس کا شمار پہلے مہینے (محرم ) کے پہلے دن اور پہلی تاریخ کے طور پرکیا گیا تھا ۔⁴ نئی تقویم کے مطابق محرم کی پہلی تاریخ 16 جولائی622 عیسوی طے کی گئی تھی۔اسلامی تقویم میں مہینوں کا تعین چاند (ہلال ) کی روئیت پر کیا جاتاہے⁵جو 29.5306 دن کے دورانیے پر مشتمل مہینہ ہے۔یوں اسلامی تقویم میں 12 مہینوں کا دورانیہ تھوڑی بہت کمی بیشی کے ساتھ 354.3671 دن بنتا ہے۔⁶

ہجری تقویم میں دنوں کی تعداد گریگورین تقویم(Gregorian Calendar) کے مقابلے میں 10سے11 دن کم ہے یوں اسلامی مہینے مستقل نہیں رہتے بلکہ وہ سال بھر گردش کرتے ہیں۔⁷ مسلم تقویم کے 12 سالوں میں 4 کو افضل تصور کیا جاتاہے۔ ⁸ان مقدس مہینوں میں ذوالقعد، ذی الحجہ، محرم اور رجب شامل ہیں۔⁹ ہجری تقویم میں مندرجہ ذیل مہینوں کو مخصوص ترتیب میں شامل کیا گیا ہے جن کے نام یہ ہیں: محرم، صفر، ربیع الاول، ربیع الثانی، جمادی الاول، جمادی الثانی، رجب ، شعبان ، رمضان ، شوال ، ذِی القعدۃا ور ذی الحجہ۔¹⁰

سماجی طبقات

قدیم تہذیبوں کے برخلاف اسلامی تہذیب میں ہر انسان ایک دوسرے کا مددگار و رفیق ہے۔ ¹¹ اسلام یہ تعلیم دیتا ہے کہ معاشرے میں تمام انسان بلحاظ ِپیدائش برابر ہیں اور ایک ہی مرد و عورت حضرت آدم اور حضرت حوا کی اولاد ہیں۔¹² وہ ایک ہی جان سے پیدا کیے گئےہیں۔¹³انسان کی پیدائش معاشرے میں اس کی حیثیت کا تعین نہیں کرتی ہے، یہی وجہ ہےکہ ذات پات کا تصور اسلام کے بنیادی اصولوں کے منافی ہے۔ پیدائش،حسب و نسب، دولت و ثروت، پیشے اور دیگر مادی فوائد کو بنیاد بنا کر معاشرتی تفریق اور امتیازی سلوک روا رکھنا اسلامی تعلیمات سے روگردانی ہے۔ حقیقی امتیاز اور اعلیٰ مراتب صرف تقویٰ و پرہیز گاری ، دیانت داری ،سچائی اور راست بازی پر منحصر ہیں۔¹⁴

اسلام میں یہ واضح کیا گیا ہے کہ تمام مؤمنین معاشرتی اور نسلی پس منظر سے قطع نظر برابر ہیں اور ایک ہی طرح کی مراعات سے لطف اندوزہونے کے حقدار ہیں۔ یہ عالمی مسلم بھائی چارے کا حصہ ہیں۔ ¹⁵اسلام میں درجہ بندی صرف تقوے کی بنیاد پر ہے۔ احادیث میں مذکور ہے کہ آخری خطبہ کے موقع پر حضورﷺ نے ارشاد فرمایا: کسی عرب کو کسی غیرعرب پر فضیلت نہیں ہے اور نہ ہی کسی غیرِعرب کو عرب پر۔ نہ ہی سفید فام سیاہ فام سے برتر ہے اور نہ ہی سیاہ فام کو سفید پر کوئی فضیلت حاصل ہے۔فضیلت کا معیار صرف تقویٰ ہے۔ ¹⁶

اسلام میں غلاموں کو بھی بھائی قرار دیا گیا ہےاور مسلمانوں کو حکم دیا گیا ہےکہ انہیں وہ کھلاؤ پہناؤ جو تم اپنے لیے پسند کرو ۔ مزید یہ تاکید کی گئی ہے کہ غلاموں کو ایسے کام نہ دئیے جائیں جس کی وہ طاقت نہیں رکھتےاور ان پر وہ بوجھ نہ ڈالا جائے جو ان کی بساط سے باہر ہو اور نہ ہی ان کو مارنا، سزا دینا، ان پر کسی بھی وجہ سے ظلم و ستم کرنے کی اجازت ہے۔ کیونکہ اسلامی تہذیب میں ہر انسان مرتبہ کی کمی بیشی کے باوجود پہلے انسان اور ذی روح ہےاس کے بعد اس کے دوسرے اوصاف و امتیازات کو شمار کیا جاتا ہے۔ یہ اس حقیقت کا واضح ثبوت ہے کہ مسلم معاشرہ امتیازی سلوک اور نسل پرستی کو برداشت نہیں کرتا بلکہ بے بس و لاچار طبقات سے تعلق رکھنے والے انسانوں کے حقوق کی پاسداری کرتا ہے جو دنیا کی کسی اور تہذیب میں نہیں دیکھا گیا ۔

خاندان

مسلمان اس بات پر یقین رکھتے ہیں کہ خاندانی زندگی انسانی معاشرے کی بنیاد ہے جو والدین اور جوان ہوتے ہوئے بچوں کے لیےایک محفوظ، صحت مند اور تربیت کے لیے سازگارماحول مہیا کرتی ہے۔ اولاد اللہ کی نعمت ہے¹⁷اور انہیں دنیا کی زینت قرار دیا گیا ہے۔¹⁸والدین پر بچوں کی پرورش اور تربیت کی ذمہ داری عائد کی گئی ہے اسی طرح اولاد کو بھی اپنے والدین کے ساتھ نیک سلوک روا رکھنے اور ادب و تعظیم بجا لانے کی تاکید کی گئی ہے یہاں تک کہ اگر ان میں سے کوئی بھی بڑھاپے کی دہلیز تک پہنچ جائے تو ان کی خدمت بجا لانے پر اُف کہنے کی بھی اجازت نہیں ہے۔¹⁹والدین کے ساتھ توہین آمیزلہجہ اختیار کرنے اور ایسی بات کرنے کی کسی صورت اجازت نہیں ہے جس سے ان کی دل شکنی ہو۔²⁰

والدین اولاد کے سرپرست مقرر کیے گئے ہیں۔²¹ ان سے توقع کی جاتی ہے کہ وہ اپنے بچوں کو صحیح اور غلط میں تمیز سکھائیں۔²²اسلامی معاشرے میں والدین کو اپنے بچوں کی جسمانی، مذہبی اور روحانی دیکھ بھال کرنے کی ذمہ داری سونپی گئی ہے جس کا مقصد یہ ہے کہ بچے نظم و ضبط اور اخلاقی خوبیوں سے آراستہ ہوجائیں اوراپنی خواہشات پر قابو رکھنے والے آزاد افراد کے طور پر پرورش پائیں جو اپنے خالق کے سچے اور حقیقی فرمانبردار ہوں۔لہٰذا محبت، شفقت، رحمت،²³ ہمدردی اوررحمدلی جیسی انسانی خوبیوں کومنتقل کرنے اور فروغ دینے کا بہترین مقام ایک مناسب خاندان ہی ہے۔

خاندان کا اسلامی تصور نکاح کے معاہدے کے ذریعے مرد اور عورت کی یکجائی ہے۔²⁴نبی اکرمﷺ کی ہدایات اور تعلیمات نکاح اور کنبہ کے قیام کی حوصلہ افزائی کرتی ہیں۔ ²⁵اسلام میں خاندان کی بنیاد رکھنے کے لیے نہ بڑا خاندان(extendedness) اور نہ ہی کثیر الازدواجی شرط ہے۔ مسلم خاندان توسیع شدہ ، مشترکہ یا غیر منقسم خاندان (Extended family)بھی ہو سکتا ہے اور کثیر الازدوجی (polygamous)بھی ،یا دونوں صورتیں ایک ساتھ بھی ہو سکتا ہے، تاہم یہ بھی ممکن ہے کہ ان دونوں میں سے کوئی بھی صورت نہ ہو۔²⁶ کثیر الازدواجی خاندان (polygamous family)کی صورت میں مسلمان مردوں کے لیے بیویوں کے مابین عدل قائم رکھنا فرض ہے۔لباس، نان نفقہ اور رہنے سہنے میں ہر ایک کو اس کا پورا پورا حق ادا کرنا لازمی ہے۔²⁷بیوی کو تکلیف دینا ایک گناہ ہے اور دوسری زوجہ سے کم رکھنا دوسرا گناہ ہے۔²⁸

اسلام نے مردوں اور خواتین کو اپنے اپنےدائرۂ کار میں رہنما بنایا ہے۔ اس کی تعلیمات کے مطابق شوہر کو کنبہ کا سربراہ بنایا گیا ہے ²⁹ اور اسے خاندان کی دیکھ بھال، حفاظت اور مجموعی طور پر سربراہی کا ذمہ دار بنایا گیا ہے۔اسے یہ ذمہ داریاں باہم مشورے، مہربانی اور احسان کے ساتھ انجام دینی ہیں۔ اس کے ساتھ ساتھ اسے کنبہ کی تمام ضروریات فراہم کرنے کا ذمہ دار بھی بنایا گیا ہے۔جب شوہر اپنے کنبے پر کچھ خرچ کرتا ہے تو اسلام اسے صدقہ قرار دیتا ہے³⁰اور ایسا نہ کرنے کی صورت میں سخت نتائج کی وعید بھی سنائی گئی ہے۔

اسلام نے بیوی کو گھر کی ملکہ بنایاہے۔ نیک و پارسا بیویاں وہ ہوتی ہیں جو اپنے شوہروں کی دیانتداری سے فرمانبرداری کرتی ہیں اور گھر و خاندان کی عزت و احترام کا خیال رکھتی ہیں۔ ³¹قرآن بیوی اور شوہر دونوں کو ایک دوسرے کا لباس قرار دیتا ہے ³²اور دونوں کو ایک دوسرے کا احترام اور دیکھ بھال کرنے کی تاکید کرتا ہے۔

مزید یہ کہ اسلام ایک ایسے ڈھیلے ڈھالے، بے ربط اور بکھرے ہوئے خاندانی نظام کا حامی نہیں ہے جو کسی بھی اختیار اور نظم و ضبط سے خالی ہو اور جس میں کوئی بھی اپنے ارکان کے مناسب طرز عمل اور روئیے کا ذمہ دار نہ ہو۔ نظم و ضبط کو صرف ایک مرکزی ذمہ دار کے ذریعہ ہی برقرار رکھا جاسکتا ہے اور اسلام کے نقطۂ نظر کے مطابق خاندان میں باپ کی حیثیت ہی ایسی ہے کہ وہ اس ذمہ داری کو نبھانے کے لیےبہترین فرد قرار دیا جاسکتاہے۔ اسلام کے مطابق ازدواجی زندگی کی اصل روح محبت، ایک دوسرے کی تفہیم اور باہمی احترام ہے۔ اگر عورت کو شوہر کی بات ماننے کے لیےکہا گیا ہے تو مرد سے گھر کی فلاح و بہبود کے لیے اپنی مراعات کو بروئے کار لانے اور بیوی سے محبت ، پیار اور مٹھاس کے ساتھ پیش آنے کا بھی مطالبہ کیا گیا ہے۔ ³³

ایک خاندان پر برادری اور معاشرے کو اچھی اولاد مہیا کرنے کی بھی ذمہ داری عائد ہوتی ہے ۔ لہٰذا نبی پاکﷺ نے مسلمانوں کو محبت کرنے والی اور اولاد پیدا کرنے والی خواتین سے شادی کرنے کی ترغیب دی ہے۔ ³⁴ خاندان کا ایک اور اہم مقصد ایسے قابل افراد پید اکرنا ہےجو علم، عمل، نیکی کو فروغ دینے اور برائی کی روک تھام کے ذریعہ معاشرے کی تعمیر کریں ۔ اس کے ساتھ ساتھ اسلام کا مقصد ایسے خاندانوں کا قیام ہے جو دوسروں کے لیے نمونہ ہوں اور جن کے طرزِعمل پر چل کر نبی اکرمﷺ کے اسوۂ حسنہ اور ہدایت و رہنمائی کی پیروی کی جا سکے۔ یہ کسی بھی خاندان کا حتمی مقصد ہے جیسا کہ قرآن کی ایک دعا میں سکھایا گیا ہےکہ:

  وَالَّذِينَ يَقُولُونَ رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا 74³⁵

  اور (یہ) وہ لوگ ہیں جو (حضورِ باری تعالیٰ میں) عرض کرتے ہیں: اے ہمارے رب! ہمیں ہماری بیویوں اور ہماری اولاد کی طرف سے آنکھوں کی ٹھنڈک عطا فرما، اور ہمیں پرہیزگاروں کا پیشوا بنا دے۔

مرد

اسلامی قانون میں مرد و عورت پر ان کی جسمانی طاقت کو مد نظر رکھتے ہوئے ذمہ داریاں عائد کی گئی ہیں۔ مرد عورتوں کے محافظ و منتظم ہیں۔³⁶ وہ ان کی ضروریات پوری کرنے اور اخراجات برداشت کرنے کا پابند ہے۔ ³⁷اسلام نے عورتوں پر خاندانی اخراجات کا بار اٹھانے کی ذمہ داری عائد نہیں کی ہے۔ مرد کو بیرونی جبکہ عورت کو گھر کے اندرونی کاموں کو سونپا گیا ہے۔

قرآن مجید میں مسلمان مرد کواسلامی تعلیمات کے مطابق زندگی گزارنے کا طریقۂ کار بتایا گیا ہے۔ اس کے بنیادی اصولوں میں اچھے کام سرانجام دینا اور برے کاموں سے باز آنا، سمجھداری اور شعور پر مبنی طرز عمل کا مظاہرہ کرنا اور عاجزی، ضبطِ نفس اور ہمدردانہ سلوک کرنا شامل ہیں۔³⁸اسے ہمیشہ سچ بولنے، دیانت داری کا مظاہرہ کرنے اور راست باز رہنے کی تاکید کی گئی ہے۔³⁹ایک مسلمان سے ہمیشہ بہادری کی توقع کی جاتی ہے اور مشکلات کا سامنا کرتے ہوئے وہ ہمیشہ اللہ پر بھروسہ کرتا ہے۔ ⁴⁰اسے کھانے پینے میں اعتدال اور بے جا فضول خرچی سے بچنےکا حکم دیا گیا ہے۔ ⁴¹ایک مسلمان سے اسلام تقاضا کرتا ہے کہ وہ ہمیشہ انصاف کا دامن تھامے رکھے اور اس کی سربلندی کےلیےجدو جہد میں مصروف رہے۔اگر کوئی معاملہ انصاف کے برخلاف دیکھے تو رضائے الٰہی کے لیے اس کی سچی گواہی دے۔ خواہ یہ گواہی اپنی جان، والدین یا رشتہ داروں کے خلاف ہی کیوں نہ ہو۔ ⁴²ایک سچے مسلمان کو بے لوث اور فراخدل ہونے کی ضرورت ہے۔ اسے اللہ کی محبت اوراس کی رضا کی خاطر مسکینوں ، یتیموں حتی کہ قیدیوں کی مدد کرنے کا حکم بھی دیا گیا ہے۔ ⁴³عاجزی،⁴⁴صبر،⁴⁵غصہ پر قابو رکھنا، عفو و در گزر اورمعاف کردینا⁴⁶ایک سچے مؤمن مرد کی خصوصیات ہیں۔

ایک مسلمان کو اپنے لباس کو صاف رکھنے کی تاکید کی گئی ہے۔⁴⁷اس کے علاوہ مسلمان مرد عورت کی ایک اہم خصوصیت شرم و حیا اور پاکدامنی ہے۔ قرآن مجید نے مرد و عورت دونوں کو نگاہیں نیچی رکھنےاور باحیا رہنے کا حکم دیا ہے۔⁴⁸قرآن مجید کی آیت کریمہ میں ایک مسلمان مرد اور ایک مسلمان عورت کی بہت سی خوبیوں کا ذکر ہے جن کے حصول کےلیےہر مسلمان کو کوشش کرنی چاہیے:

  إِنَّ الْمُسْلِمِينَ وَالْمُسْلِمَاتِ وَالْمُؤْمِنِينَ وَالْمُؤْمِنَاتِ وَالْقَانِتِينَ وَالْقَانِتَاتِ وَالصَّادِقِينَ وَالصَّادِقَاتِ وَالصَّابِرِينَ وَالصَّابِرَاتِ وَالْخَاشِعِينَ وَالْخَاشِعَاتِ وَالْمُتَصَدِّقِينَ وَالْمُتَصَدِّقَاتِ وَالصَّائِمِينَ وَالصَّائِمَاتِ وَالْحَافِظِينَ فُرُوجَهُمْ وَالْحَافِظَاتِ وَالذَّاكِرِينَ اللَّهَ كَثِيرًا وَالذَّاكِرَاتِ أَعَدَّ اللَّهُ لَهُمْ مَغْفِرَةً وَأَجْرًا عَظِيمًا35⁴⁹

  بیشک مسلمان مرد اور مسلمان عورتیں، اور مؤمن مَرد اور مؤمن عورتیں، اور فرمانبردار مرد اور فرمانبردار عورتیں، اور صدق والے مرد اور صدق والی عورتیں، اور صبر کرنے والے مرد اور صبر کرنے والی عورتیں، اور عاجزی کرنے والے مرد اور عاجزی کرنے والی عورتیں، اور صدقہ و خیرات کرنے والے مرد اور صدقہ و خیرات کرنے والی عورتیں اور روزہ دار مرد اور روزہ دار عورتیں، اور اپنی شرم گاہوں کی حفاظت کرنے والے مرد اور حفاظت کرنے والی عورتیں، اور کثرت سے اللہ کا ذکر کرنے والے مرد اور ذکر کرنے والی عورتیں، اللہ نے اِن سب کے لیے بخشش اور عظیم اجر تیار فرما رکھا ہے۔

اس آیت میں یہ واضح کیا گیا ہے کہ اللہ کے نزدیک کن خوبیوں اور خصوصیات کی حقیقی قدر ہے۔ یہ اسلام کی بنیادی اقدار ہیں ۔ ان کے لحاظ سے مرد اور عورت میں کوئی فرق نہیں ہے۔ تاہم معاملات زندگی میں مرد و عورت دونوں کے کام کرنے کے دائرے الگ الگ ہیں۔ مردوں کےلیے کچھ مخصوص شعبوں میں کام کرنا زیادہ بہتر ہے جبکہ بعض شعبہ خواتین کےلیے زیادہ بہتر ہے۔ لیکن اگر وہ ان خوبیوں اور خصوصیات کے یکساں حامل ہیں تو اللہ ان کو برابر کے درجات عطا فرمائے گا اور ان کو برابر اجر و ثواب سے نوازے گا۔ اگر ان میں سے ایک نے گھریلو کام سرانجام دئیے اور دوسرے نے خلافت کے فرائض پورے کیے اور شرعی احکامات نافذ کیے تو اس سے ان کے درجات اور اجر وثواب پر کوئی اثر نہیں پڑے گا۔اسی طرح عورتیں گھر میں بچوں کی پرورش کریں اورمرد میدانِ جہاد میں جاکراللہ اور اس کے دین کی خاطر لڑیں تو اس سے ان کے درجات پر فرق نہیں پڑتا ہے⁵⁰ لیکن بحیثیت مرد کے اعلاء کلمۃ الحق کے لیے اپنی جانوں کا نذرانہ پیش کرنااور اسلام کی سربلندی کے لیے تن، من اور دھن کی بازی لگانا مرد کی دیگر اہم ذمہ داریوں میں سے ہےجس کی عدم ادائیگی پر وہ عنداللہ مسئول ہے، کیوں کہ اس کی بدنی ساخت اور قوت کا تقاضہ یہی ہے کہ وہ ان کو صرف مال و دولت کمانے کے لیے ہی صرف نہ کرے بلکہ اللہ کے دین کی سربلندی کے لیے بھی استعمال کرے۔

خواتین

مرد و عورت کے مابین دنیا و آخرت دونوں میں حیثیت، حقوق اور احسانات کے لحاظ سے کوئی فرق نہیں ہے۔ جہاں تک روزمرہ کے امورِ زندگی کا تعلق ہے تو اس میں دونوں برابر کے شریک ہیں۔ اگر اسلام مر د و عورت کی جنسی مساوات کے بجائے دونوں کی صنفی تقسیم پر زور دیتا ہے تو اس کی وجہ یہ ہے کہ اسلام اس تصور کو ناپسند کرتا ہے کہ مر د وعورت میں سے کوئی بھی جنس اپنے کو زیادہ قوی محسوس کرے یا خود کو کمتر تصور کرکے خود کو دوسری جنس میں ڈھالنے کی کوشش کرے۔جیسا کہ حضور نبئ کریم ﷺ كا فرمان ہے کہ:

  أن رسول اللّٰه صلى اللّٰه عليه وسلم قال : لعن المرأة تتشبه بالرجال، والرجل يتشبه بالنساء.⁵¹

  ان عورتوں پر لعنت ہے جو مردوں سے مشابہت کرتی ہیں اور ان مردوں پر لعنت ہے جو عورتوں سے مشابہت کرتے ہیں۔

حدیث میں واضح بیان کیا گیا ہے کہ کسی ایک بات میں بھی مرد کو عورت‘ عورت کو مرد کی وضع لینی حرام و موجب لعنت ہے۔⁵² یعنی عورت مردوں کے جوتے، کپڑے اور دستار وغیرہ نہ پہنے‘ اسی طرح مردوں کو عورتوں کی طرح چلنا،زیورات پہننا، ان کی طرح باتیں کرنا اور ان کا لباس اختیار کرنا منع ہے۔⁵³

دیگر قدیم تہذیبوں کا مطالعہ کیا جائے تو یہ واضح ہوتا ہے کہ وہاں نہ صرف خواتین کے بنیادی حقوق سے روگردانی کی گئی تھی بلکہ انہیں تربیت اور درجہ بندی میں پست رکھا گیا تھا۔ میسوپوٹیمیا ، سومیری ، اشوری اور بابلی تہذیبوں نے خواتین کے ساتھ توہین آمیز سلوک روا رکھا اور ان کی رائے کو غیر اہم سمجھا تھا۔ حمورابی کاقانون(Hammurabi law) خواتین کو ان غلط امور کا ذمہ دار ٹھہراتا تھا جو حقیقت میں انہوں نے انجام دیے ہی نہیں تھے۔ مرد کے قاتل کے برعکس کسی عورت کے قاتل مرد کوسزائے موت نہیں دی جاتی تھی۔⁵⁴

زمانہ جاہلیت میں باپ دادا کے ترکہ سے مرد وارث ہوتے تھے لیکن عورتوں کو وراثت میں حصہ نہیں دیا جاتا تھا۔⁵⁵ اسی طرح چھوٹا بچہ خواہ لڑکا ہی ہو وہ اپنے ماں باپ کے ترکہ کا وارث نہیں بن پاتا تھا۔⁵⁶اس کی وجہ یہ بیان کی جاتی کہ جو میدانِ جنگ میں دادِ شجاعت دینے کے قابل نہیں وہ میراث پانے کا بھی حقدار نہیں ہے۔ ہندوستان میں بھی عورتیں وارث شمار نہیں کی جاتی تھیں اور یورپ میں تو گنگا ہی الٹی بہہ رہی تھی، صرف بڑا لڑکا وارث بنتا دوسرے لڑکے بھی محروم رہ جاتے تھے۔یہ حالت تھی جب قرآن کی یہ انقلاب آفرین آیت نازل ہوئی۔⁵⁷

  لِلرِّجَالِ نَصِيبٌ مِمَّا تَرَكَ الْوَالِدَانِ وَالْأَقْرَبُونَ وَلِلنِّسَاءِ نَصِيبٌ مِمَّا تَرَكَ الْوَالِدَانِ وَالْأَقْرَبُونَ مِمَّا قَلَّ مِنْهُ أَوْ كَثُرَ نَصِيبًا مَفْرُوضًا7⁵⁸

  مردوں کے لیے اس (مال) میں سے حصہ ہے جو ماں باپ اور قریبی رشتہ داروں نے چھوڑا ہو اور عورتوں کے لیے (بھی) ماں باپ اور قریبی رشتہ داروں کے ترکہ میں سے حصہ ہے۔ وہ ترکہ تھوڑا ہو یا زیادہ (اللہ کا) مقرر کردہ حصہ ہے۔

اسلام نے خواتین کو مہذب زندگی، تعلیم ، جائیداد ، شادی ، بچوں کی دیکھ بھال ، وراثت ، ملازمت اور معاشرتی احترام کا حق دیاہے۔ اسلام میں کسی خانقاہی نظام یا رہبانیت (monasticism) کا تصورنہیں ہے۔⁵⁹ معاشرتی زندگی سے الگ تھلگ ہونے کا کوئی راستہ نہیں ہے نیز ماں باپ، رشتہ داروں، یتیموں اور مسکینوں کے ساتھ حسن سلوک کا حکم دیا ہے۔⁶⁰ مزید یہ کہ اسلام نے ماں کے حقوق کو باپ سے تین درجے زیادہ رکھا ہے⁶¹جو کہ ایک عورت ہی ہے، حتی کہ اتنی رعایت ہے کہ اگر کوئی شخص نفل نماز پڑھ رہا ہے تو ماں کے بلانے پر اسے ماں کے پاس جانا واجب ہے۔⁶² ماں کا حق مقدم کرنے کی وجہ یہ ہے کہ اولاد کی تربیت میں ماں کو زیادہ مشقت اٹھانا پڑتی ہے، ماں کی اولاد پر شفقت زیادہ ہوتی ہے، حمل، وضع حمل، دودھ پلانے اور پرورش کے دیگر مراحل طے کرنے میں ماں کو زیادہ مشقت ہوتی ہے۔⁶³

اسلام نے خواتین کو مواقع اور ذرائع کی مناسبت سے مذہب کی ترویج و اشاعت میں اپنا حصہ ڈالنے کی بھی ترغیب دی ہے۔ اسلامی تاریخ میں ایسی بے شمار مثالیں موجود ہیں جہاں خواتین نے کامیابی کے ساتھ دین اسلام کی تبلیغ اور تعلیمی میدان میں خدمات انجام دیں ہیں۔ اس کی ایک قابل ذکر مثال امّ المؤمنین حضرت عائشہ کی ہے جو ایک انتہائی ذہین خاتون تھیں۔صحابۂ کرام فرماتے ہیں کہ ہم اصحاب رسول کو کسی بات میں اشکال ہوتا تو ہم سیدہ عائشہ کی بارگاہ میں سوال کرتے تو آپ کے پاس سے ہی اس کا جواب پاتے۔⁶⁴ آپ علوم قرآنیہ، علوم حدیث کی جامع، بڑی محدّثہ اور بڑی فقیہ خاتون تھیں۔⁶⁵ آپ نے حضور ﷺ نے بہت سی احادیث روایت فرمائیں، آپ کو تاریخ پر بڑی آگاہی تھی اور اشعار عرب پر بھی بڑی نظر تھی۔ آپ سے 2210 احادیث مروی ہیں جن میں 174 متفق علیہ ہیں یعنی بخاری اور مسلم دونوں کی روایات ہیں اور 54 احادیث صرف بخاری کی ہیں اور 68 احادیث مسلم کی ہیں۔⁶⁶ ان کے علاوہ بقیہ دیگر کتب احادیث میں ہیں۔نبئ اکرمﷺ کے دنیا سے پردہ فرمانے کے بعد تقریباً 50 سال حیات رہیں اور اپنی انتہائی عمدہ یاداشت (جسے فوٹو گرافک میموری کہا جا سکتا ہے) کی بدولت آپﷺ سے سیکھی ہوئی ہر بات کو بڑی تفصیل سےبیان کرنے کی صلاحیت رکھتی تھیں۔آپ تقریبا ًنصف صدی تک امت ِ مسلمہ کے لیے ایک انتہائی معلوماتی اور تعلیمی کردار ادا کرنے میں کامیاب رہیں۔مختصر طور پر یہ کہ وہ امت کے لیے ایک زندہ ریکارڈکی حیثیت رکھتی تھیں۔ یہاں تک کہ عبد اللہ ابن العباس مشہور مفسرِ قرآن ہیں حضرت عائشہ کے ہی شاگرد تھے۔⁶⁷

اسلام عورت کو اپنے مالی معاملات اورقانونی معاملات خود سنبھالنے کا مکمل حق دیتاہے۔ا س کے علاوہ اسلام عورت کو اپنے حقوق کے لیے شوہر یا کسی دوسرے شخص کے خلاف عدالت میں مقدمہ پیش کرنے کا بھی حق دیتا ہے۔ عدالتی گواہی کے انتظامات اور تقاضوں کے مطابق عورت کی گواہی کو اکیلے یا ساتھ تسلیم کرتی ہے۔ یہ اس کی قانونی رائے ، فیصلے اور مشاورت کو بھی قبول کرتی ہے۔ ⁶⁸ ول ڈیورانٹ (Will Durant)لکھتاہے:

  He placed woman on the same footing with man in legal processes and in financial independence; she might follow any legitimate profession, keep her earnings, inherit property, and dispose of her belongings at will. He abolished the Arab custom of transmitting women as property from father to son. Women were to inherit half as much as the male heirs, and were not to be disposed of against their will.⁶⁹

  آپﷺ نے قانونی عمل اور مالی خودمختاری میں عورت کو مرد کے ساتھ برابری عطا فرمائی۔ وہ کوئی بھی جائز پیشہ اپنا سکتی ہے، اپنی کمائی اپنے پاس رکھ سکتی ہے، جائیداد کی وارث ہوسکتی ہے اور اپنی تمام ملکیت کو اپنی مرضی کے مطابق استعمال کر سکتی ہے۔ انہوں نے عورتوں کو باپ سے بیٹے کی طرف مثلِ جائیداد منتقل ہونے کے زمانۂ جاہلیت کے رسم و رواج کو ختم کردیا۔ عورتوں کے لیے میراث میں مرد ورثاء کے مقابلے میں آدھا حصہ تھا جس میں ان کی مرضی کے خلاف کوئی بھی تصرف نہیں کر سکتا تھا۔

اسلامی تاریخ کے مختلف مراحل میں ہزاروں ممتاز اور باشعور تعلیم یافتہ خواتین نے سائنس، علم کے مختلف شعبوں اور عرب اسلامی ثقافت کےمختلف شعبوں میں عمدہ کارکردگی کا مظاہرہ کیا ہے۔ احمد بن علی بن حجر العسقلانی نےاپنی کتاب"الاصابۃ فی تمییز الصحابۃ" میں 1543 خواتین کا سوانحی خاکہ پیش کیا ہےجن میں عالمہ، مبلغین اور انتہائی قابل اور پڑھی لکھی خواتین شامل ہیں۔ اسی طرح امام النووی نے" تھذیب الاسماء و اللغات"میں،اسی طرح الخطیب البغدادی نے اپنی "تاریخ بغداد" میں، السخاوی نے "الضوء اللامع لاهل القرن التاسع" میں اور دیگر بہت سے اہل ِ علم اور مورخین نے قانون وفقہ، شاعری اور ادب وغیرہ جیسی علمی اصناف میں شہرت حاصل کرنے والی خواتین کے احوال مرقوم کیے ہیں ۔⁷⁰اسی طرح زندگی کے دیگر شعبۂ جات میں بھی خواتین کو مناسب حق دیا گیا ہے اور انہیں فکری، علمی اور قانونی آزادی مہیا کی گئی ہے‘ مگر یقیناً اسے آزادی شرعی حدود میں رہتے ہوئے استعمال کرنے کاپابند بنایا گیا ہے جو کہ یقیناً اس آزادی سے لاکھ درجے بہتر ہےجو آج جدید مغرب عورت کو دینے پر تُلا ہوا ہے‘ کیونکہ جو آزادی عورت کو آج مغرب نے دی ہےاس کے نتیجے میں عورت صرف دل لبھانے اور مرد کی شہوانی خواہشات کی تکمیل کا آلۂ کار بن کر رہ گئی ہے، اس کی عزت، عفت، پاکدامنی، حیا، شرم و غیرت ہر چیز کو داؤ پر لگا کر نام نہاد آزادی کا وہ علم پکڑا دیا گیا ہے جو دراصل اس کے لباس کو تار تار کرکے تیار ہوا ہے۔ جب کہ اسلام نے عورت کو جو آزادی یا حقوق دئیے ہیں اس میں اس کی عزت، حرمت، عفت اور پاکدامنی کا مکمل بندوبست ہےجس کی بنیاد پرنہ تو وہ کسی مرد کی شہوت کی تکمیل کا آلۂ کار رہتی ہےبلکہ اگر وہ خود بھی شیطان کے دھوکے میں آکر کوئی غلط اور غیر سنجیدہ اقدام کرنا چاہے تو وہ کرنےسے قاصر رہتی ہے‘ گویا ایک طرف تو اس کو تمام بنیادی حقوق بھی دئیے گئے ہیں تو دوسری طرف اس کو معاشرے میں بگاڑ کا باعث نہ بننے دینے کے لیے سازگار ماحول بھی فراہم کیا گیا ہےتاکہ وہ باعزت طریقے سے اپنے حقوق بھی حاصل کرلے اور اس کا دامن بھی پاک و صاف اور طاہر و مطہر رہےتاکہ اس کے مثبت اثرات اس کی کوکھ سے جنم لینے والی اگلی نسل تک منتقل ہوسکیں۔

اولاد

اسلام بچے کی ولادت پر خوشیاں منانے کی اجازت دیتا ہے۔ ان میں سب سے اہم امر یہ ہے کہ نوزائیدہ بچے یا بچی کے داہنے کان میں اذان دی جاتی ہےاور اس کے بائیں کان میں اقامت کہی جاتی ہے۔⁷¹ایک اوراہم رسم "عقیقہ" ہے جس میں جانوروں کی قربانی ، شیر خوار بچے کا سر مونڈنا اور خیرات کے کام انجام دینا شامل ہیں۔ بچے کی پیدائش کے ساتویں دن⁷² بارگاہ الٰہی میں اظہارِ شکر کے لیے ایک بھیڑ، بکری، یا مینڈھے کی قربانی دی جاتی ہے⁷³اور اس کا گوشت غرباء، مساکین میں تقسیم کرنے کی ترغیب دی گئی ہے۔

اسلام میں ختنہ کی ایک بہت ہی مشہور رسم ہے۔حدیث میں اس کی خاص تاکید کی گئی ہے کہ مسلمان ختنہ کرے۔⁷⁴یہ كلمۂ طیبہ کی مثل شعائر اسلام میں شامل ہے اس سے کافر اور مسلمان میں باہم امتیاز ہوتا ہے۔⁷⁵ختنہ عام طور پر لڑکوں کا کیا جاتا ہے لڑکیوں کے ختنہ کرنے کا تاکیدی حکم نہیں ہے۔⁷⁶صحیح طریقہ یہ ہے کہ بچے کی ولادت کے ساتویں دن ختنہ کرے کہ یہ مستحب ہے۔⁷⁷ آج کی جدید سائنس کے مطابق بھی مرد اور عورت کی صحت کے لیے ختنہ نہایت مفید ہے کیونکہ اس کی وجہ سے کئی جراثیم ایسے ہیں جو انسان کے جسم سے دور رہتے ہیں، بصورت دیگر وہ مرد کے اضافی جلد کے نیچے پرورش پاکر شوہر اور اس کی زوجہ دونوں کے لیے نقصان دہ ثابت ہوتے ہیں۔ اسی طرح ماؤں کو یہ تاکید کی جاتی ہے کہ وہ کم سے کم دو سال تک اپنے بچے کو دودھ پلا ئیں تاکہ بچہ صحت مند ہو۔ اگر ماں اپنے بچے کو دودھ پلانے سے قاصر ہے تو اسلام اس کی اجازت دیتا ہے کہ وہ بچے کو دودھ پلانے کے لیے رضاعی والدہ کی خدمات حاصل کرے۔⁷⁸اس طرح یہ یقینی بنایا گیا ہے کہ بچے کی بہترین نشو نما ہو سکے۔

اگر کسی بچے کے والدین کا انتقال ہوجاتا ہے تو اسلام اس بات کو یقینی بناتا ہے کہ یتیموں کے ساتھ اچھا سلوک کیا جائے۔ قرآن کریم نے ان کے تحفظ کے لیےقوانین دے کر ان کی املاک کو محفوظ بنایا ہے۔ قرآن مجید مسلمانوں کو ہدایت دیتا ہے کہ یتیموں کے ساتھ ساتھ والدین اور ضرورت مندوں کے ساتھ بھی اچھا سلوک کریں جبکہ ⁷⁹ساتھ ہی یہ وعید سناتا ہے کہ وہ لوگ جو یتیموں کی املاک اور حقوق غصب کرتے ہیں وہ سزا کے حقدار ہیں۔

  إِنَّ الَّذِينَ يَأْكُلُونَ أَمْوَالَ الْيَتَامَى ظُلْمًا إِنَّمَا يَأْكُلُونَ فِي بُطُونِهِمْ نَارًا وَسَيَصْلَوْنَ سَعِيرًا 10⁸⁰

  بیشک جو لوگ یتیموں کے مال ناحق طریقے سے کھاتے ہیں وہ اپنے پیٹوں میں نری آگ بھرتے ہیں، اور وہ جلد ہی دہکتی ہوئی آگ میں جا گریں گے۔

اسلامی طرز زندگی میں اولاد کی تعلیم اور اس کی تربیت پر بہت زیادہ زور دیا گیا ہے۔ اس کی وجہ یہ ہے کہ ایک بچّہ اور بچی ہی کل جوان ہوکر اسلامی معاشرے کے رکن بنتے ہیں اور باپ اور ماں کی صورت میں اپنے فرائض اور ذمہ داریوں کو ادا کرتے ہیں۔ اگر ان کی تعلیم و تربیت پر بچپن میں بھرپور توجہ نہ دی جائے تو وہ بچہ اور بچی مستقبل میں اپنا وہ کردار ادا کرنے سے قاصر رہتے ہیں جو اسلام کو ان سے مطلوب ہے۔ اسی لیے حضورﷺ کی سیرتِ طیبہ میں آپﷺ کی بچوں کے متعلق خاص نصیحتیں اور تعلیمات ہمیں ملتی ہیں جو کسی بھی قوم کی ترقی اور بہتر و روشن مستقبل کے لیے اساس کےطور پر استعمال کی جاسکتی ہیں۔

غلام

آغاز سے ہی اسلام نے غلاموں کو آزاد کرنے اور غلامی کے خاتمے کے دروازے کھول دئیےتھے۔ اسلام میں نہ ہی دنیاوی حقائق کو نظرانداز کیا گیا ہے اور نہ ہی غلامی کی توثیق کی گئی ہے۔ اسلام نے غلامی کو قواعد و ضوابط کا پابند بنایا ہے اور اس سے مناسب طریقے سے نمٹنے کا راستہ دیا ہے۔ جیسا کہ اینی میری(Annemarie Schimmel)نامی ایک جرمن اسکالر نے اس معاملے کی وضاحت کی ہے۔وہ اپنی کتاب میں لکھتی ہے :

  "...therefore, slavery is theoretically doomed to disappear with the expansion of Islam." ⁸¹

  اسی لیے غلامی نظریاتی طور پر اسلام کی توسیع کے ساتھ ہی غائب ہوتی چلی گئی۔

اسلامی قانون نے ان طریقوں کو سختی سے محدود کردیا تھا جن سےغلاموں کی تعداد بڑھ سکتی تھی۔ غلامی کا واحد ذریعہ جنگی قیدی اور غلام والدین کے یہاں پیدا ہونے والی اولاد تھی۔اسلامی تعلیمات کے مطابق جنگ کی صورت میں قیدیوں کو غلام بنانے کی ضرورت نہیں تھی۔ قران حکیم میں جنگی قیدیوں کےلیے دیگر طریقۂ کار موجود ہیں۔ مثلاً غیر مشروط آزادی اور تاوان وغیرہ۔⁸²غلاموں کی تعداد میں نئے اضافے کو محدود کرنے کے بعد اسلامی قانون نے موجودہ غلاموں کی حقیقت کی طرف توجہ دی اور انتہائی مصلحت اور دور اندیشی سے غلامی ختم کرنے کی کوشش کی۔ یہ اصول کہ انسان آزاد پیدا ہوا ہے اور غلامی حادثاتی ہے تمام علمائے اسلام نے قبول کیا ہے۔رضاکارانہ غلامی کی اجازت نہیں ہے اور کسی بھی آزاد شخص کو غلام نہیں بنایا جاسکتا ہے۔ اس کےمتعلق حضرت محمدﷺنے 1400 سال قبل فرما دیا اور اس عمل کو گناہ قرار دیا تھا۔ آپﷺ نے فرمایا:

  قال اللّٰه: ثلاثة أنا خصمهم يوم القيامة: رجل أعطى بي ثم غدر، ورجل باع حرا فأكل ثمنه، ورجل استأجر أجيرا فاستوفى منه ولم يعط أجرہ ".⁸³

  اللہ تعالیٰ کا ارشاد ہے: میں قیامت کے دن تین شخصوں کے خلاف مدعی بنوں گا، ایک وہ جس کو میرے نام کے ساتھ عہد دیا گیا، پھر اس نے اس عہد کے خلاف کیا، دوسرا وہ شخص جس نے کسی آزاد آدمی کو فروخت کرکے اس کی قیمت کھائی (یعنی اس کو غلام بنایا یا بنوایا) اور تیسرا وہ شخص جس نے کسی مزدور کو اجرت پر طلب کیا ،اس سے پورا کام لیا ، بھر اس کی اجرت نہیں دی۔

مزید یہ کہ غلاموں کے بارے میں نبئ اکرم ﷺکی تعلیمات ہیں کہ: تمہارے غلام تمہارےبھائی ہیں۔ خدا نے انہیں تمہاری دیکھ بھال میں رکھا ہے۔ لہٰذا جو کوئی اپنے بھائی کی دیکھ بھال کر رہا ہے اسے چاہیے کہ جو کھانا وہ خود کھائے وہ ہی اپنے غلام بھائی کوبھی کھلائے اور جو لباس وہ خود پہنے ویسا ہی لباس اپنے غلام بھائی کو پہنائے۔ اور ان پر ان کی اہلیت سے زیادہ بوجھ نہ ڈالے۔ اگر ان پرکام کا بوجھ زیادہ ہے تو اضافی بوجھ بانٹ کر ان کے کام میں مدد کرے۔⁸⁴

آپﷺ نے یہ بھی فرمایا کہ:جب تم میں سے کسی کا خادم اس کے لیے کھانا تیار کرے اور اس دوران اس نے گرمی اور دھواں برداشت کیا ہو تو اسے چاہیے کہ وہ اسے (خادم) اپنے ساتھ بٹھالے اور اسے (اپنے ساتھ) کھانے پر مجبور کرے یا پھر اس کے لیے کھانے میں سے حصہ چھوڑ دے۔⁸⁵

مذہبی احکام و عبادات میں اجروثواب اور سزا کے لحاظ سے آزاداور غلام دونوں برابر ہیں۔اسلام میں ایک غلام کو ذاتی سامان اور جائیدادرکھنے کا بھی حق تھا۔ خون بہا، قصاص، بدلے یا دیّت کے معاملے میں بھی آزاد اور غلام برابر تھے۔مسلمان غلام تعلیم اور فوجی تربیت بھی حاصل کرتے تھے۔ بعد کے ادوار میں غلاموں نے مصر، ہندوستان اور ایران میں حکمران خاندانوں کی بنیاد بھی رکھی تھی۔⁸⁶ایک غلام اپنے مالک سے معاہدہ کرکے آزادی بھی حاصل کرسکتا تھا۔اس سلسلے میں مالک اور غلام ایک خاص رقم پر راضی ہوجاتے تھے اور غلام طے شدہ رقم کما کر مالک کو دینے کے بعد قانونی طور پر آزاد ہو جاتا تھا ۔ اس عمل کو "مکاتبت" کے نام سے جانا جاتا ہے۔قرآن کریم کی سورۃ النور میں اس کی وضاحت کی گئی ہے۔⁸⁷ایک دوسرا عمل بھی ہےجو"تدبیر" کے نام سے جانا جاتا ہےجس کے تحت مالک کی موت پر غلام کو آزاد کیا جاسکتا تھا۔ تاہم مسلمانوں نے بڑی تعداد میں غلاموں کو محض خرید کر اللہ تعالیٰ کی رضا کے لیے بھی آزاد کیا تھا۔

لونڈیاں،باندیاں ، کنیزیں اور داشتہ عورتیں

جنسی آزادی اور غیر ذمہ دارانہ سلوک کو اسلام نے ماضی کی بے ضرراور معمولی غلطیاں قرار دے کر نظر انداز نہیں کیا بلکہ اسلام یہ تعلیم دیتا ہے کہ یہ ایسے افعال ہیں جو انسانی معاشرے کی اصل جڑ اور بنیاد کو کھوکھلا کر کے پورے معاشرے کو بوسیدہ کرنے والے ہیں۔ لہٰذا اسلام اس مجرمانہ قانون کے تحت نکاح کے علاوہ جنسی تعلقات (Extra Matrimonial Sexual-Relationships)کے ہر عمل کو گناہ اور قابل سزا عمل قرار دیتا ہے ۔ اس کا اصل مقصد معاشرے کو ا ن تمام غیر انسانی سرگرمیوں سے پاک و صاف کرنا ہے جو اس طرح کے غیر ذمہ دارانہ اقدامات کی حوصلہ افزائی اور اس کے لئےمواقع فراہم کرتی ہیں۔ ⁸⁸

اسلام نے لونڈیوں کی ملکیت کی اجازت دی ہےکیونکہ جنگ سے پیدا ہونے والے غیر معمولی حالات کے نتیجے میں کئی عورتیں بے بس اور بے سہارا ہو جاتی ہیں ۔⁸⁹ ان خواتین کے پاس جانے کے لیے کوئی جگہ اور ٹھکانہ نہیں ہوتا اور وہ مکمل طور پر بے بس ہوتی ہیں۔ چنانچہ جب ایسی عورتیں مسلمانوں کی تحویل میں آئیں تو انہیں مناسب کھانا ، تحفظ ، لباس ، رہائش اور عزت سے نوازا گیا تھا۔ مسلمانوں کو اپنی ملکیت میں موجود لونڈیوں کے ساتھ جنسی تعلقات رکھنےکی اجازت تھی لیکن ان عورتوں کے استحصال کو سخت ناپسند کیا گیا تھا اور یہی اصول و ضوابط آج بھی ہیں۔

ایسی عورتوں کے رحم سے پیدا ہونے والے بچوں کے ساتھ وہی سلوک کیا جاتا تھا جوقانونی بیوی کے بچوں کے ساتھ روا رکھا جاتاہے۔ یوں وہ خاتون خود بخود ایک عام لونڈی کے زمرے سے نکل کر"اُم ِ ولد" کے درجے پر چلی جاتی ہےجسے ایک عام لونڈی کے مقابلے میں کئی مراعات حاصل ہوتی تھیں۔ کچھ لوگ تو اولاد کی پیدائش کے بعد ان لونڈیوں کو آزاد کرکے باقاعدہ نکاح کرلیتے تھے۔ ⁹⁰مزید یہ کہ تمام مسلمانوں کے پاس کنیزیں یا لونڈیاں نہیں تھیں ، زیادہ تر ان کوآزاد کر کے ان سے شادی کر لیتے تھے۔ اس طرح کے عمل کو اسلام نے بہت پسند کیا ہے اور حوصلہ افزا قرار دیا۔⁹¹

لباس

اسلام نے انسانوں کے لیے کوئی ایک طے شدہ معیاری لباس (fixed standard clothing)مقرر نہیں کیا ہے تاہم لباس کے معاملے میں کچھ تقاضے ہیں جن کو پورا کرنا ضروری ہے۔ لباس کے بارے میں اسلامی حکم یہ ہے کہ لباس ایسا نہ ہو کہ جس سے ستر اور پوشیدہ ا عضاء ظاہر ہوں ۔ خواتین کو اپنی پسند کے مطابق لباس پہننے کی اجازت ہے بشرطیکہ یہ لباس ان کے چہرے ، ہاتھوں اور پیروں کے علاوہ ان کے پورے جسم کو ڈھانپ دے۔ اس کے ساتھ ساتھ انہیں اپنے بالوں کو ڈھانپنا بھی ضروری ہے۔ بعد کے ادوار میں کچھ علمائے اسلام نے احادیث نبوی کی روشنی میں چند معاشروں کی ضروریات کے پیش ِ نظر خواتین کو اپنی حفاظت کی خاطر چہرہ ڈھانپنے کی بھی ترغیب دی ہے۔

مردوں کے لیے ناف اور گھٹنوں کے درمیان کا حصہ ڈھانپنا فرض ہے⁹² لہٰذا اگر انسان استطاعت رکھتا ہے تو اسے اچھا لباس زیب تن کرنا چاہیے۔ اسلام یہ بھی ہدایت دیتا ہے کہ لباس کم از کم اتنا ڈھیلا ہو کہ جسمانی اعضاء ظاہر نہ ہوں۔ جلدسے چپکے ہوئے تنگ لباس، پتلے اور باریک لباس، جسم کی ساخت اور بناوٹ ظاہر کرنے والے لباس اور فیشن کے طور پر پھٹے ہوئے لباس پہننے سے منع کیا گیاہے۔عام طور پر کچھ مسلمان خواتین جسم کو چھپانے کے لیے اپنے لباس پر چادر اوڑھ لیتی ہیں جس کو اسلامی تہذیب میں بنظر استحسان کے دیکھا جاتا ہے۔

لباس کے حوالے سے نبی اکرم ﷺ نے فرمایا ہے کہ بعد کے ادوار میں ایسے بھی لوگ ہوں گے جو لباس میں ملبوس ہوں گے مگر پھر بھی وہ برہنہ جسم اور بے لباس ہوں گے۔ علمائے اسلام نے اس کی وضاحت کرتے ہوئے لکھا ہے کہ وہ لوگ ایسے باریک اور جسم کو ظاہر کرنے والے لباس پہنتے ہوں گےکہ ان کا جسم یہاں تک کہ ان کے پوشیدہ اعضاء بھی اس لباس سے دکھائی دیتے ہوں گےجیسا کہ آج کل با آسانی دیکھا جاسکتا ہے۔ اس قسم کا لباس پہننے والے افراد کو جنسی حملوں کا خطرہ ہوتا ہے اور وہ معاشرے کے اخلاقی بگاڑ اور جنسی ہوس کو ہوا دینے کا سبب بھی بنتے ہیں۔ اسی لیے انہیں آخرت میں تکلیف دہ سزاؤں کی تنبیہ کی گئی ہے⁹³ اور مسلمانوں کو اس سے اجتناب کا حکم دیا گیا ہے۔

اسلام لوگوں کو اپنی قدرتی بناوٹ اور شکل و صورت پر راضی رہنا سکھاتا ہے اور یہ احساس دلاتا ہے کہ مسلمان کو مسلمان کی طرح ہی نظر آنا چاہیے نہ کہ اپنے آس پاس کے دوسرے عقائد کے لوگوں کی تقلید کرنی چاہیے۔ خواتین کو اپنی نسوانیت پر خوش رہنا چاہیے نہ کہ مردوں کی طرح لباس پہن کر ان کی نقالی کرنی چاہیے۔ اسی طرح مردوں کو اپنی مردانگی پر راضی رہناچاہیے اور اپنے لباس اور چہرے میں خواتین کی نقل کرنے کی کوشش نہیں کرنا چاہیے۔ اسی وجہ سے مسلمان مردوں کو سونے یا ریشم پہننے سے منع کیا گیا ہے کیونکہ یہ نسوانی لوازمات سمجھے جاتے ہیں۔⁹⁴

سماجی و معاشرتی اجتماعات اور تقریبات

اسلامی تعلیمات اور احکامات جو یقیناً انسانی نفسیات سے مطابقت رکھتے ہیں ،صحت مندانہ تفریح اور بامقصد خوشی کے اظہار کے مواقع کو فروغ دیتے ہیں۔ اسلام میں ایسی تمام تفریحی سرگرمیوں کی اجازت ہے جو قرآن و سنت کی تعلیمات کے منافی نہ ہوں نیز یہ اللہ کی نعمتوں پر شکر ادا کرنے کا ذریعہ بھی ہیں۔

شادی (نکاح)

کنبہ یا خاندان ایک انسانی سماجی گروہ ہے جس کے ارکان خون کے رشتے یا ازدواجی تعلقات کے ذریعے ایک دوسرے سے جڑ جاتےہیں۔ شادی (نکاح)کو معاشرے کی اساس تسلیم کیا جاتا ہے۔ بحیثیت ادارہ شادی(نکاح) انسان کو ترقی کی طرف لے جاتی ہے اور یہ نسل انسانی کے تسلسل کا ایک ذریعہ ہے۔ شادی(نکاح) اگرچہ ایک معاہدہ ہے تاہم یہ باہم محبت و انس کو فروغ دینے والا عمل بھی ہے۔ اس کے مقاصد میں نفس کو قابو میں رکھنے، بچوں کی پیدائش اورمعاشرے کی فلاح اور بہتری کا نظم و نسق شامل ہے۔ نکاح کا بنیادی مقصد نسل انسانی کا تحفظ ہے جس کے تحت عصمت کی پاکیزگی اور شوہر و بیوی کے مابین محبت اور اتحاد کو فروغ دینے کے لیے مر د وعورت کے مابین جنسی تعلق(جماع) کی منظوری ہے۔ یہ جنسی تعلق کو جائز کرنے اور بچوں کی پیدائش کا ایک معاہدہ ہے تاکہ قابل احترام اور قانونی طریقے سے تمام حیاتیاتی و جسمانی ضروریات کو پورا کیا جاسکے۔

اسلامی نظام میں شادی(نکاح) اور کنبہ مرکزی حیثیت کے حامل ہیں۔ یہ دراصل زندگی، معاشرے اور نسلِ انسانی کے با وقار، بامقصد تسلسل اور بقا کا ذریعہ ہے۔ یہ ایک ایسا عہدہے کہ شادی(نکاح) کے بندھن میں بندھ جانے والے مرد و عورت نہ صرف ایک دوسرے کے ساتھ وفا کرتے ہیں بلکہ ان کا یہ عہداپنے معبود ِ حقیقی کے ساتھ بھی ہوتا ہے۔ یہ ایک قسم کا عہد ہے جس میں وہ باہمی تکمیل و خود شناسی، محبت وامن، ہمدردی و سکون اور راحت کو تلاش کرتے ہیں۔ یہ سب کچھ اس لیے ہے کہ اسلام میں شادی(نکاح) کو اولین انسانی ضرورت، نیک عمل ، اخلاص اور دینداری کا محرک سمجھا جاتاہے۔

ازدواجی اقدار اور شادی(نکاح) کے مقاصد کا اسلامی تہذیب اور نظامِ حیات میں ایک خاص معنی و مفہوم ہے۔ اگر انسان اللہ تعالیٰ سے جڑا ہو تو اس مقصدِ حیات کو مزید تقویت ملتی ہے نیز اسے مذہبی وابستگی اور خدائی نعمتوں میں بھی شمار کیا جاتا ہے۔ یہی اسلام میں شادی(نکاح) کا مرکزی نقطہ ہے جو مرد و عورت میں محبت و الفت اورخلوص پر مبنی ایسے جائز اور پاکیزہ رشتے کی بنیاد رکھتا ہے جس میں نہ صرف کسی معاشرے کی بلکہ پوری نسلِ انسانی کی بقا اور سالمیت کا راز پنہاں ہے۔یہی وجہ ہے کہ اسلام اپنے ماننے والوں کو نکاح کرنے کی ترغیب دیتا ہے۔

نکاح انبیائےکرام کی سنتوں میں سے ایک ہے ۔ نبی اکرمﷺ سے مروی ہے کہ آپ ﷺنے ارشاد فرمایا کہ نکاح ہر اس مسلمان کے لیے ضروری ہے جو جسمانی طور پر تندرست ہو اور معاشی طور پراس کا متحمل ہو نیزجو معاشی تنگدستی یا دیگر وجوہات کی بنا پر نکاح کی استطاعت نہیں رکھتا اسے روزہ رکھنے کی ہدایت کی گئی ہے۔⁹⁵مزید یہ کہ نبی اکرمﷺ نے فرمایا کہ نکاح میری سنت ہے اور جو میری سنت کو ناپسند کرتا ہےاس کا مجھ سے کوئی تعلق نہیں ہے۔⁹⁶

دیگر تہذیبوں کے برخلاف اسلامی تہذیب میں خواتین کو نکاح کو قبول کرنے یا مسترد کرنے کا حق حاصل ہے۔ نبی اکرمﷺ کی تعلیمات اور سنت کی رُو سے ازدواجی معاہدے کے قیام، صحت اور قانونی حیثیت کے لیےلڑکی کی رضامندی سب سے اہم بنیادی شرط ہے۔اگر والدین لڑکی سے اس کی رضامندی معلوم کیے بغیر اپنی مرضی سے نکاح طے کردیں تو لڑکی ایسی صورت میں شادی سے انکار کرسکتی ہے۔ حضرت ابن عباس نے روایت کیا ہے کہ ایک لڑکی حضور اقدسﷺ کی بارگاہ میں حاضر ہوئی اور عرض کی کہ اس کے والد نے اس کی رضامندی کے بغیر اسے زبردستی شادی کرنے پر مجبور کیا ہے۔نبئ کریم ﷺنے اسے انتخاب کا حق دیا کہ چاہے توشادی کو قبول کرلے یا اسے باطل قرار دے۔⁹⁷

نکاح کی حقیقت مرد و عورت کی جانب سے ایجاب و قبول ہے⁹⁸ اس کے لیے شرط یہ ہے کہ لڑکا و لڑکی عاقل ہوں، اس کے علاوہ ان کا بالغ ہونا بھی شرط ہے لیکن اگر نابالغ سمجھدار ہیں تو نکاح منعقد ہوجائے گا لیکن ولی کی اجازت پر موقوف رہے گا۔ مزید یہ کہ گواہ موجود ہوں یعنی ایجاب و قبول دو مرد یا ایک مرد اور دو عورتوں کے سامنے ہو۔ مسلمان کے لیے مسلمان گواہ کا ہونا ضروری ہے کافر کی شہادت یہاں معتبر نہیں۔⁹⁹ نبی اکرمﷺسے مروی ہے کہ آپ نے فرمایا: نکاح صدق یا مہر (Dower)، ولی(Guardian)اور شاہِدَین (Witnesses)کے بغیر منعقد نہیں ہوتا ہے۔¹⁰⁰ اگر لڑکی بالغ ہے تو اس کا راضی ہونا بھی ضروری ہے۔ مہر کا تعین جائز نکاح کی ایک سب سے اہم ضرورت ہے۔ شوہر کی طرف سے بیوی کو حق مہر دینا بیوی کے حقوق میں سے ہے جس کا ادا کرنا قرآن کریم نے فرض قرار دیا ہے۔¹⁰¹

ایک شخص کو ایک وقت میں زیادہ سے زیادہ چار بیویاںرکھنے کی اجازت ہے لیکن اس شرط پر کہ وہ اپنی تمام بیویوں کے تمام حقوق یکساں طور پر پورا کرنے کے قابل ہو۔اگر وہ ایسا کرنے سے قاصرہے تو اسے صرف ایک عورت سے نکاح کرنے کی اجازت دی گئی ہے۔ سورۃ نسامیں اللہ تعالی ٰ کافرمان ہے کہ:

  وَإِنْ خِفْتُمْ أَلَّا تُقْسِطُوا فِي الْيَتَامَى فَانْكِحُوا مَا طَابَ لَكُمْ مِنَ النِّسَاءِ مَثْنَى وَثُلَاثَ وَرُبَاعَ فَإِنْ خِفْتُمْ أَلَّا تَعْدِلُوا فَوَاحِدَةً أَوْ مَا مَلَكَتْ أَيْمَانُكُمْ ذَلِكَ أَدْنَى أَلَّا تَعُولُوا 3¹⁰²

  اور اگر تمہیں اندیشہ ہو کہ تم یتیم لڑکیوں کے بارے میں انصاف نہیں کرسکوگے تو ان عورتو ں سے نکاح کرو جو تمہارے لئے پسندیدہ اور حلال ہو ، دو دو اور تین تین اور چار چار (مگر یہ اجازت بشرط عدل ہے )پھر اگر تمہیں اندیشہ ہو کہ تم (زائد بیویوں میں )عدل نہیں کرسکوگے تو صرف ایک ہی عورت سے (نکاح کرو) یا وہ کنیزیں جو (شرعاً) تمہاری ملکیت میں آئی ہوں ، یہ بات اس سے قریب تر ہے کہ تم سے ظلم نہ ہو ۔

دوسری طرف خواتین کو ایک وقت میں صرف ایک مرد سے نکاح کرنے کی اجازت ہے تاکہ بچے کی نسل اور اس کا نسب محفوظ رہے۔ اگر اسے بھی ایک ہی وقت میں چار شوہر رکھنے کی اجازت دی جاتی تو پھر بچے کی حقیقی باپ کا تعین اور بچے کی نسل معلوم کرنا خاصا دشوار ہوجاتا۔ اس کے ساتھ ساتھ کئی سماجی ، اخلاقی اور معاشی مسائل بھی جنم لے سکتے تھے ۔ اسی لیے شریعت مطہرہ کا حکم انسانی نفسیات اور معاشرتی تقاضوں کے عین مطابق ہے ۔

اسلام میں نکاح انتہائی آسان اور سادہ عمل ہے۔ اس میں دولہا اور دلہن پر کسی قسم کا بوجھ نہیں پڑتا ہے۔ دلہن، دولہا اور ان کے والدین یا ولی کی رضامندی حاصل کرنے کے بعد دولہا کم از کم دو سمجھدار مسلمان بالغ افراد کے سامنے حق ِمہر پر متفق ہونے کے بعد دلہن کو نکاح کی پیش کش کرتا ہے اگر دلہن اس پیش کش کو قبول کرلے تونکاح منعقد ہو جاتا ہے۔

یہ تمام عمل صرف زبانی طور پربھی کیا جاسکتا ہے لیکن قانونی مقاصد کے لیے مناسب ریکارڈ مرتب کیا جاتا ہے۔ اس معاہدے کے بعد ایک شخص عموماً نکاح سے متعلق اسلامی تعلیمات کے حوالے سےخطبہ دیتا ہے جو رسول اللہﷺ کی سنت ہے اس کے بعد نوبیاہتا جوڑے کی خوشحال زندگی کے لیے دعا کی جاتی ہے۔ پھر اگر دلہا دلہن یا ان کے والدین یا ان کے اعزاو اقربا استطاعت رکھتے ہیں تو وہ حسب ِ توفیق ایک دعوت کا اہتمام کرتے ہیں جسے "ولیمہ" کہا جاتا ہے۔¹⁰³

ولیمہ کرنا بھی رسول اللہﷺ کی سنت ہے۔ رسول اللہ ﷺنے خود اپنےنکاح کے بعد دعوتِ ولیمہ کا اہتمام فرمایا تھا۔آپﷺ نے حضرت زینب بنت جحش سے نکاح کے موقع پر گوشت اور روٹی جبکہ حضرت صفیہ سے شادی کے موقع کھجور ، پنیر اور مکھن سے بنے کھانے کا اور ایک اور موقع پر جَو کی روٹی کا اہتمام فرمایا تھا۔¹⁰⁴حدیث مبارکہ میں یہ بھی آیا ہے کہ شادی کی دعوت میں زیادہ سے زیادہ مہمانوں کی شرکت مستحن ہے کیونکہ ایک طرف تو اس سے شادی کا زیادہ وسیع پیمانے پر اعلان ہوتا ہے اور دوسری طرف زیادہ سے زیادہ افراد کنبے اور دولت میں برکت اور رحمت کی دعا کرتےہیں۔¹⁰⁵ ایک طرف نوبیاہتا جوڑے کی خوشی میں سب شریک ہوتے ہیں تو دوسری طرف زنا جیسی حرام کاری اور باعثِ عار عمل سے بچنے کی ان کو ترغیب ملتی ہےکیونکہ گناہ گار سے گناہ گار شخص بھی زنا کی لعنت میں ملوث ہونے کے عمل کو لوگوں سے چھپانا چاہتا ہے جو کہ اس کے لیے ذہنی اور روحانی اذیت کا باعث ہوتا ہے۔ اس کے برعکس نکاح کا حلال عمل جنسی خواہشات کی باعزت تکمیل کا ذریعہ ہے جس کا لوگوں میں متعارف ہوجانا قلبی سکون میسر آجاتا ہے۔ سب سے بڑھ کر کھلے عام نکاح کا یہ فائدہ ہوتا ہےکہ مرد و عورت دونوں لوگوں کی نگاہ میں ایک دوسرے کے لیے مخصوص ہوجاتے ہیں جس کے نتیجے میں عمومی طور پر ان کو گناہ کی دعوت دیتے ہوئے جنس مخالف کے لیے شرعی اصول و ضوابط، قانون، اخلاق اور معاشرہ آڑ بن جاتا ہے اور وہ زنا کی لعنت سے بنسبت ایک غیر شادی شدہ شخص کے زیادہ محفوظ ہوجاتے ہیں۔

محرمات

مسلمان کسی بھی عورت سے نکاح کرسکتے ہیں سوائے ان خواتین کے جنہیں قرآن مجید نے ممنوع قرار دیا ہے۔ ممنوعہ خواتین کی دو اقسام ہیں:

1. ہمیشہ کے لیے حرام خواتین یہ ہیں: دادی، دادی کی ماں اور اس سے اوپر والیاں پھر اس کی اپنی سگی اور سوتیلی ماں، نانی، بیٹی، پوتی، نواسی اور اس کے بچے ، قطع نظر اس کا کہ نسب نامے میں ان خواتین میں سے کوئی کتنا ہی اوپر یا نیچے ہو۔ بہنیں، خالہ، پھوپھی، بھتیجی، بھانجی، ساس، بیویوں کی بیٹیاں، باپ کی بیوی اور بیٹے کی بیوی سے نکاح حرام ہے۔¹⁰⁶بچے کو دودھ یا رضاعت سے قائم ہونے والا رشتہ بھی خون کے رشتوں کی طرح ہے اور اسی طرح ان سے بھی نکاح نہیں ہو سکتا جس طرح خون کے رشتوں سے نہیں ہو سکتاہے۔ لہٰذا رضاعی بھائی اور بہن وغیرہ سےنکاح حرام ہے۔
2. عارضی طور پر یا مخصوص شرائط کی وجہ سے جن عورتوں سے نکاح حرام ہے وہ یہ ہیں:

• ایک ہی وقت میں ایک شخص دو بہنوں سے نکاح نہیں کرسکتاہے۔¹⁰⁷اسی طرح ایک ہی وقت میں بیوی اور اس کی خالہ، بھانجی، پھوپھی اور بھتیجی وغیرہ سے بھی نکاح نہیں کیا جاسکتا ہے۔
• طلاق یا شوہر کی موت کے نتیجے میں حالت ِ عدت میں عورت سے نکاح نہیں ہو سکتا۔
• تین طلاق کی صورت میں اس عورت کااُسی شوہر کے ساتھ دوبارہ نکاح نہیں ہوسکتا جب تک اس نے کسی دوسرے مرد سے شادی نہ کی ہو اور اس سے طلاق نہ ہو گئی ہو۔ ¹⁰⁸
• غیر مسلم مشرک عورت سے نکاح نہیں ہو سکتا جب تک کہ وہ اسلام قبول نہ کرلے ¹⁰⁹یا اہل کتاب کا مذہب یعنی یہودیت یا عیسائیت قبول نہ کرلے ۔ ¹¹⁰
• کسی غلام کےلیے اپنی مالکن سے شادی(نکاح) کرنا جائز نہیں ہے جب تک وہ آزاد نہ کردیا جائے۔ اسی طرح کوئی شخص اپنی باندی سے نکاح نہیں کر سکتا جب تک وہ اسے آزاد نہ کردے۔¹¹¹

طلاق

نکاح سے عورت شوہر کی پابند ہوجاتی ہے ، اس پابندی کے اٹھادینے کو طلاق کہتے ہیں ۔ اس کی دو صورتیں ہیں ایک یہ کہ اسی وقت نکاح سے باہر ہوجائے اسے بائن کہتے ہیں ، دوم یہ کہ عدت گزرنے پر باہر ہوگی ، اسے رجعی کہتے ہیں ۔¹¹²طلاق دینا جائز ہے لیکن اگر بغیر کسی وجہ کے ہے تو شرعی طور پر ممنوع ہے اور اگر کوئی وجہ ہے تو مباح ہے یعنی دے سکتا ہے۔ ¹¹³

طلاق کی اقسام

طلاق کی تین قسمیں ہیں: اَحسن، حسن اور بِدعی۔ جس طہر ¹¹⁴میں وطی نہ کی ہو اُس میں ایک طلاق رجعی دے اور چھوڑے رہے یہاں تک کہ عدّت گزر جائے، یہ طلاقِ احسن ہے۔

اگر غیر موطؤہ ¹¹⁵کو طلاق دی اگرچہ حیض کے دنوں میں دی ہو یا موطؤہ ¹¹⁶کو تین طہر میں تین طلاقیں دیں، بشرطیکہ نہ ان طہروں میں وطی کی ہو نہ حیض میں، یا پھر تین مہینے میں تین طلاقیں اُس عورت کو دیں جسے حیض نہیں آتا مثلاً نا بالغہ یا حمل والی ہے یا عورت سنِ ایاس ¹¹⁷کی عمر کو پہنچ گئی ہو تو یہ سب صورتیں طلاق حسن کی ہیں۔¹¹⁸

طلاق بدعی کی تین صورتیں ہیں :اول یہ کہ ایک ہی مجلس میں تین طلاقیں دفعۃً دی جائیں خواہ ایک کلمہ سے ہو، مثلاً اپنی بیوی کو کہے : تم کو طلاق دی، تم کو طلاق دی، تم کو طلاق دی۔ دوم یہ کہ عورت کی ماہواری کے ایام میں اس کو ایک طلاق دی جائے اس طلاق سے رجوع کرنا واجب ہے اور یہ طلاق شمار کی جاتی ہے۔ سوم یہ کہ جن ایام میں عورت سے وطی کی ہو، ان ایام میں عورت کو ایک طلاق دی جائے۔ طلاق بدعی کسی صورت میں ہو اس کا دینے والا گناہ گار ہوتا ہے۔¹¹⁹

قرآن مجید میں اللہ تعالیٰ ارشاد فرماتا ہے:

  الطَّلَاقُ مَرَّتَانِ فَإِمْسَاكٌ بِمَعْرُوفٍ أَوْ تَسْرِيحٌ بِإِحْسَانٍ وَلَا يَحِلُّ لَكُمْ أَنْ تَأْخُذُوا مِمَّا آتَيْتُمُوهُنَّ شَيْئًا إِلَّا أَنْ يَخَافَا أَلَّا يُقِيمَا حُدُودَ اللَّهِ فَإِنْ خِفْتُمْ أَلَّا يُقِيمَا حُدُودَ اللَّهِ فَلَا جُنَاحَ عَلَيْهِمَا فِيمَا افْتَدَتْ بِهِ تِلْكَ حُدُودُ اللَّهِ فَلَا تَعْتَدُوهَا وَمَنْ يَتَعَدَّ حُدُودَ اللَّهِ فَأُولَئِكَ هُمُ الظَّالِمُونَ229 فَإِنْ طَلَّقَهَا فَلَا تَحِلُّ لَهُ مِنْ بَعْدُ حَتَّى تَنْكِحَ زَوْجًا غَيْرَهُ فَإِنْ طَلَّقَهَا فَلَا جُنَاحَ عَلَيْهِمَا أَنْ يَتَرَاجَعَا إِنْ ظَنَّا أَنْ يُقِيمَا حُدُودَ اللَّهِ وَتِلْكَ حُدُودُ اللَّهِ يُبَيِّنُهَا لِقَوْمٍ يَعْلَمُونَ230وَإِذَا طَلَّقْتُمُ النِّسَاءَ فَبَلَغْنَ أَجَلَهُنَّ فَأَمْسِكُوهُنَّ بِمَعْرُوفٍ أَوْ سَرِّحُوهُنَّ بِمَعْرُوفٍ وَلَا تُمْسِكُوهُنَّ ضِرَارًا لِتَعْتَدُوا وَمَنْ يَفْعَلْ ذَلِكَ فَقَدْ ظَلَمَ نَفْسَهُ وَلَا تَتَّخِذُوا آيَاتِ اللَّهِ هُزُوًا وَاذْكُرُوا نِعْمَتَ اللَّهِ عَلَيْكُمْ وَمَا أَنْزَلَ عَلَيْكُمْ مِنَ الْكِتَابِ وَالْحِكْمَةِ يَعِظُكُمْ بِهِ وَاتَّقُوا اللَّهَ وَاعْلَمُوا أَنَّ اللَّهَ بِكُلِّ شَيْءٍ عَلِيمٌ 231¹²⁰

  دوبارطلاق دینے کے بعد یا تو دستور کے مطابق روک لینا ہے، یا اس کو حسن سلوک کے ساتھ چھوڑ دینا ہے اور تمہارے لیے اس (مہر یا ہبہ) سے کچھ بھی لینا جائز نہیں ہے جو تم ان کودے چکے ہو، مگر جب دونوں فریقوں کو یہ خوف ہو کہ وہ اللہ کی حدود کو قائم نہ رکھ سکیں گے ، سو (اے مسلمانو ! ) اگر تمہیں یہ خوف ہو کہ یہ دونوں اللہ کی حدود کی قائم نہ رکھ سکیں گے تو عورت نے جو بدلِ خلع دیا ہے اس میں کوئی حرج نہیں ہے یہ اللہ کی حدود ہیں سو تم اللہ کی حدود سے تجاوز نہ کرو، اور جنہوں نے اللہ کی حدود سے تجاوز کیا تو وہی لوگ ظالم ہیں۔ پھر اگر اس کو (تیسری) طلاق دے دی تو وہ عورت اس (تیسری طلاق) کے بعد اس پر حلال نہیں ہے یہاں تک کہ وہ عورت اس کے علاوہ کسی اور مرد سے نکاح کرے، پھر اگر وہ (دوسرا خاوند) اس کو طلاق دے دے تو پھر ان پر کوئی حرج نہیں ہے کہ وہ اس (طلاق کی عدت کے بعد) پھر باہم رجوع کرلیں اگر ان کا یہ گمان ہو کہ وہ دونوں اللہ کی حدود کو قائم رکھ سکیں گے۔ اور یہ اللہ کی حدود ہیں جن کو اللہ ان لوگوں کیلیے بیان فرماتا ہے جو علم والے ہیں۔ اور جب تم عورتوں کو (رجعی) طلاق دو، پھر وہ اپنی عدت (کی میعاد) کو پہنچیں تو انھیں دستور کے مطابق (اپنے نکاح میں) روک لو یا ان کو حسن سلوک کے ساتھ چھوڑ دو ، اور ان کو ضرر پہنچانے کے لیے نہ روکے رکھو تاکہ تم ان پر زیادتی کرو ، اور جس نے ایسا کیا تو بیشک اس نے اپنی جان پر ظلم کیا ، اور اللہ کی آیتوں کو مذاق نہ بناؤ ، اور تم پر جو اللہ کی نعمت کی گئی ہے (اس کو) یاد کرو اور اللہ نے تم پر جو کتاب اور حکمت ناز کی ہے وہ تم کو اس کی نصیحت کرتا ہے اور اللہ سے ڈرتے رہو ، اور یقین رکھو کہ اللہ ہر چیز کو خوب جاننے والا ہے۔

طلاق(Divorce)ایک غیر معمولی واقعہ ہے جو غیر معمولی صورتحال میں وقوع پذیر ہوتا ہے۔ لیکن اس انتہائی جذباتی معاملے میں بھی قرآن مجید مسلمانوں کو انصاف ، نرمی ،رحمدلی اور نیکی پر مبنی برتاؤکرنے کا حکم دیتا ہے۔ حضورﷺ نے فرمایا کہ جن چیزوں کی اجازت(یعنی حلال یا جائزہیں) ہے ان میں سے اللہ تعالیٰ کو طلاق سب سے زیادہ ناپسندیدہ ہے۔¹²¹

طلاق کیوں مشروع کی گئی؟

اسلام کا منشاء یہ ہے کہ جو لوگ نکاح کے رشتہ میں منسلک ہوجائیں تو ان کے نکاح کو قائم رکھنے کی حتی المقدور کوشش کی جائے اور اگر کبھی ان کے درمیان اختلاف یا نزاع پیدا ہو تو رشتہ دار اور مسلم سوسائٹی کے ارباب حل وعقد اس اختلاف کو دور کرکے ان میں صلح کرائیں اور اگر ان کی پوری کوشش کے باوجود زوجین میں صلح نہ ہو سکے اور یہ خطرہ ہو کہ اگر یہ بدستور رشتہ نکاح میں بندھے رہے تو یہ حدود اللہ کو قائم نہ رکھ سکیں گے اور نکاح کے مقاصد فوت ہوجائیں گے تو ان کو عدم موافقت اور باہمی نفرت کے باوجود ان کو نکاح میں رہنے پر مجبور نہ کیا جائے، اس صورت میں ان کی، ان کے رشتہ داروں اور معاشرہ کے دیگر افراد کی بہتری اور مصلحت اسی میں ہے کہ عقد نکاح کو توڑنے کے لیے شوہر کو طلاق دینے سے نہ روکا جائے۔ طلاق کے علاوہ عقد نکاح کو فسخ کرنے کے لیے دوسری صورت یہ ہے کہ عورت شوہر کو کچھ دے دلا کر خلع کرا لے اور تیسری صورت قاضی کی تفریق ہے اور چوتھی صورت یہ ہے کہ جن دو مسلمان حَکموں کو نزاعی حالت میں معاملہ سپرد کیا گیا ہو اوہ نکاح کو فسخ کرنے کا فیصلہ کردیں۔

طلاق دینے کا حق مرد کو تفویض کیا گیا ہے حالانکہ عقد نکاح عورت اور مرد دونوں کی باہمی رضامندی سے وجود میں آتا ہے۔ اس کی ایک وجہ یہ ہے کہ عورت مغلوب الغضب اور جذباتی ہوتی ہے اور اس کو جلد غصہ آتا ہے اگر طلاق دینے کا معاملہ عورت کے اختیار میں ہوتا تو وقوع طلاق کی شرح دو چند سے بھی زیادہ بڑھ جاتی۔ عام طور پر یہ دیکھا گیا ہے کہ عورت کے مطالبہ اور اس کی ضد پر شوہر طلاق دیتا ہے۔ دوسری وجہ یہ ہے کہ مرد کے مقابلہ میں عورت کی قوت فیصلہ کمزور ہوتی ہے، خصوصاً ایام حیض میں عورت ذہنی اضطراب میں مبتلا ہونے کی وجہ سے منتشر الذہن اور مزاج میں چڑچڑے پن کا شکار ہوجاتی ہے، اس لیے اگر طلاق دینے کا معاملہ عورت کے سپرد کیا جاتا تو شرح طلاق زیادہ ہوجاتی اور اکثر ہنستے بستے گھر ویران ہوجاتے۔ تیسری وجہ یہ ہے کہ عورتیں ناقص العقل ہوتی ہیں اور فسخ نکاح کا معاملہ ناقص العقل کے سپرد کرنے کے لائق نہیں ہے۔ طلاق کا معاملہ مرد کو تفویض کرنے کی چوتھی وجہ یہ ہے کہ چونکہ مرد اپنا مال خرچ کرکے حقوق زوجیت حاصل کرتا ہے اس لیے ان حقوق سے دست کش ہونے کا اختیار بھی اسی کو دیا گیا ہے اور ظاہر ہے کہ جو شخص اپنا روپیہ خرچ کرکے کوئی چیز حاصل کرتا ہے وہ اس چیز کو آخری حدتک رکھنے کی کوشش کرتا ہے اور صرف اس وقت اس چیز کو چھوڑتا ہے جب اس کو چھوڑنے کے سوا اور کوئی چارہ کار باقی نہ رہے۔ اس کے برخلاف حقوق زوجیت کو قائم کرنے میں عورت کو کوئی محنت کرنی پڑتی ہے نہ پیسہ خرچ کرنا پڑتا ہے اس لیے اگر طلاق کی باگ ڈور عورت کے ہاتھ میں دے دی جاتی تو عورت کو طلاق واقع کرنے میں اس قدر سوچ وبچار اور تامل کی ضرورت نہ ہوتی۔ علاوہ ازیں یہ اقدام عدل و انصاف کے بھی خلاف ہوتا۔ ¹²²

خلع

طلاق کو مرد کے اختیار میں دینے کا مطلب یہ نہیں ہے کہ وقوع طلاع میں عورت کا بالکل دخل نہیں ہے۔ عورت کو خلع کا اختیار دیا گیا ہے اگر عورت کو مرد کی شکل و صورت پسند نہ ہو یا کسی اور طبعی نامناسبت کی وجہ سے وہ مرد کو ناپسند کرتی ہو تو وہ اپنا مہر چھوڑ کر یا کچھ مال دے کر شوہر سے طلاق کا مطالبہ کرسکتی ہے۔

حضرت ابن عباس سے روایت کرتے ہیں کہ حضرت ثابت بن قیس کی بیوی نبی کریمﷺکے پاس گئیں اور عرض کیا : یا رسول اللہﷺ ! میں ثابت کے خُلق اور اس کے دین کے بارے میں کوئی حرف گیری نہیں کرتی لیکن میں اسلام کے بعد کفر (ناشکری یا شوہر کے حقوق کو ادا نہ کرنا) کو ناپسند کرتی ہوں۔ رسول اللہﷺ نے فرمایا : کیا تم اس کا باغ واپس کردوگی ؟ (ثابت نے ان کو مہر میں باغ دیا تھا) انھوں نے کہا : ہاں ! رسول اللہ ﷺ نے ثابت سے فرمایا : باغ لے لو اور اس کو طلاق دے دو۔¹²³

اس حدیث کی روشنی میں یہ ہونا چاہیے کہ جب کسی عورت کو کسی طبعی ناہمواری کی وجہ سے شوہر ناپسند ہو اور یہ نفرت اس قدر بڑھ جائے کہ وہ اس نفرت کی وجہ سے شوہر کے حقوق ادا نہ کرسکے تو پھر وہ قاضی اسلام سے رجوع کرے جو اسے مہر واپس کرکے شوہر سے طلاق دلادے۔ یاد رہے کہ یہاں قاضی شوہر سے طلاق دلوائے گا از خود نکاح فسخ نہیں کرے گا۔ ¹²⁴جب خلع ہوجائے تو طلاق بائن واقع ہو جاتی ہے اور جو مال ٹھہرا ہے عورت پر اُس کا دینا لازم ہوتا ہے۔¹²⁵

اسلام میں نسل کشی کی مذمت

زمانۂ جاہلیت میں عرب لڑکوں اور لڑکیوں کو فقر کے ڈر قتل کردیا کرتے تھے¹²⁶اس کے علاوہ وہ لڑکیوں کو بوجھ سمجھتے۔ کیونکہ رہزنی اور قزاقی جو اِن کے سب سے بڑے وسائلِ معاش تھے، اس میں لڑکے تو حصہ لیتے لیکن لڑکیاں بڑی ہو کر بھی اس میں ان کا ہاتھ نہیں بٹا سکتی تھیں۔¹²⁷ اس وقت اسلام ایک ایسےواحد مذہب کے طور پر سامنے آیا جس نے نہ صرف اس بربریت کی شدید انداز سے مذمت کی بلکہ ہر بچے کے حقوق کا تحفظ کیا اور اس وحشیانہ رسم کو ختم کردیا۔قرآن مجید میں مشرکین کے حالات کا تذکرہ مندرجہ ذیل طریقے سے کیا گیاہے۔

  وَإِذَا بُشِّرَ أَحَدُهُمْ بِالْأُنْثَى ظَلَّ وَجْهُهُ مُسْوَدًّا وَهُوَ كَظِيمٌ 58 يَتَوَارَى مِنَ الْقَوْمِ مِنْ سُوءِ مَا بُشِّرَ بِهِ أَيُمْسِكُهُ عَلَى هُونٍ أَمْ يَدُسُّهُ فِي التُّرَابِ أَلَا سَاءَ مَا يَحْكُمُونَ 59 ¹²⁸

  اور جب ان میں سے کسی کو لڑکی (کی پیدائش) کی خوش خبری سنائی جاتی ہے تو اس کا چہرہ سیاہ ہو جاتا ہے اور وہ غصہ سے بھر جاتا ہے۔وہ لوگوں سے چُھپا پھرتا ہے (بزعمِ خویش) اس بری خبر کی وجہ سے جو اسے سنائی گئی ہے، (اب یہ سوچنے لگتا ہے کہ) آیا اسے ذلت و رسوائی کے ساتھ (زندہ) رکھے یا اسے مٹی میں دبا دے (یعنی زندہ درگور کر دے)، خبردار! کتنا برا فیصلہ ہے جو وہ کرتے ہیں۔

ایک باشعور اور سمجھدار شخص کواس بات پر غورکرنے کی ضرورت ہے کہ قرآن پاک لڑکی کی پیدائش کے بارے میں کتنے بہترین الفاظ کا انتخاب کرتا ہے۔ "خوشخبری" کے الفاظ یہ ظاہر کرتے ہیں کہ اسلام میں لڑکیوں کو کتنی عزت اور اہمیت دی جاتی ہے اور اسے اللہ کی رحمت سے تعبیر کیاجاتا ہے ۔ مزید یہ کہ قرآن پاک نے انسانیت کوواضح طور پر یہ حکم دیا ہے کہ وہ بھوک و افلاس ، غربت یا وسائل کی کمی کے خوف سے اپنے بچوں کو قتل نہ کریں۔¹²⁹اس نے انسانوں پر یہ بھی واضح کردیا کہ اللہ نےانہیں، ان کی اولاد اور دنیا کے ہر جاندار کو رزق دینے کی ذمہ داری خود لی ہے۔¹³⁰ لہذا تمام انسانوں کو اللہ پر بھروسہ کرنا چاہیئے اور اسی سے کشادگئ رزق کی دعا و درخواست کرنی چاہیئے ۔

اسلام میں جسم فروشی کی مذمت

اسلام جسم فروشی کو معاشرے میں پریشانی اور انتشار کی ایک بنیادی وجہ سمجھتا ہے کیونکہ یہ ناجائز تعلقات اور زنا کاری کا ایک اہم ذریعہ ہے۔ اس کے برخلاف اسلام نکاح کی شکل میں مرد اور خواتین کے مابین ایک بہت ہی معزز اور قابل احترام رشتہ شادی کی صورت پیش کرتا ہے اور ہر حالت میں زنا کی مذمت کرتا ہے۔ اسلام ایک مسلمان کو زنا کے قریب جانے کی بھی اجازت نہیں دیتا ہے اور ان الفاظ میں اس کے خلاف سخت سزا کا اعلان کرتا ہے:

  الزَّانِيَةُ وَالزَّانِي فَاجْلِدُوا كُلَّ وَاحِدٍ مِنْهُمَا مِائَةَ جَلْدَةٍ وَلَا تَأْخُذْكُمْ بِهِمَا رَأْفَةٌ فِي دِينِ اللَّهِ إِنْ كُنْتُمْ تُؤْمِنُونَ بِاللَّهِ وَالْيَوْمِ الْآخِرِ وَلْيَشْهَدْ عَذَابَهُمَا طَائِفَةٌ مِنَ الْمُؤْمِنِينَ 2¹³¹

  بدکار عورت اور بدکار مرد (اگر غیر شادی شدہ ہوں) تو ان دونوں میں سے ہر ایک کو (شرائطِ حد کے ساتھ جرمِ زنا کے ثابت ہو جانے پر) سو (سو) کوڑے مارو (جبکہ شادی شدہ مرد و عورت کی بدکاری پر سزا رجم ہے اور یہ سزائے موت ہے) اور تمہیں ان دونوں پر اللہ کے دین (کے حکم کے اجراء) میں ذرا ترس نہیں آنا چاہیے اگر تم اللہ پر اور آخرت کے دن پر ایمان رکھتے ہو، اور چاہیے کہ ان دونوں کی سزا (کے موقع) پر مسلمانوں کی (ایک اچھی خاصی) جماعت موجود ہو۔

اس سزا کی شدت، خصوصاً نکاح کے بعد سنگسار کرنے کی سخت سزا اس جرم کی شدت کو ظاہرکرتی ہے۔ یہ سزا انسانوں کو اذیت دینے کے لیے نہیں بلکہ ان کی بہتری و بہبود اور پورے معاشرے کی بھلائی کے لیے تعلیم کی گئی ہے۔ اس طرح کی سزا جسم فروشی اور دوسرے ناجائز تعلقات سے باز رکھنےکے عمل کو یقینی بناتی ہے ۔ اسی طرح جب عوام زنا سے باز آجائیں گے اور لوگوں کے حقوق پامال نہیں ہوں گے تو ایک متوازن معاشرہ قائم ہوگا، اسی لیے اسلام نے زنا کے متبادل کے طور پر تعدد ازواج کے طریقۂ کار کی ترغیب دی ہے اور لوگوں کو ایک سے زیادہ نکاح کرنے کی طرف ابھارا ہے تاکہ ہر عورت اور اس کی اولاد کا کوئی ولی ہو جو ان دونوں کو ناصرف اپنا نام دے بلکہ ان کے جملہ معاملات کی کفالت کرکے دونوں کو باعزت زندگی مہیا کرسکے۔

اسلام میں ہم جنس پرستی کی مذمت

یہ خیال کہ جنسی تعلق صرف محبت ، خوشی اور جسمانی تسکین تک محدود ہےاور خاندانی نظام کی تشکیل سے اس کا کوئی لینا دینا نہیں ہے، یہ اسلام کی رو سے بالکل غلط خیال ہے۔ دوسری اہم بات یہ ہے کہ "ہم جنس پرستی" خود ایک غیر فطری اور حیوانی عمل ہے جو صرف اور صرف جسمانی اور معاشرتی نقصان کا باعث بنتا ہے۔ ہم جنس پرستی کے بارے میں ، قرآن پاک فرماتا ہے:

  أَتَأْتُونَ الذُّكْرَانَ مِنَ الْعَالَمِينَ 165 وَتَذَرُونَ مَا خَلَقَ لَكُمْ رَبُّكُمْ مِنْ أَزْوَاجِكُمْ بَلْ أَنْتُمْ قَوْمٌ عَادُونَ 166¹³²

  یا تم سارے جہان والوں میں سے صرف مَردوں ہی کے پاس (اپنی شہوانی خواہشات پوری کرنے کے لیے) آتے ہو، اور اپنی بیویوں کو چھوڑ دیتے ہو جو تمہارے رب نے تمہارے لیے پیدا کی ہیں، بلکہ تم (سرکشی میں) حد سے نکل جانے والے لوگ ہو۔

قرآن حکیم میں بیان کیا گیا ہے کہ ہم جنس پرستی میں ملوث لوگوں کو ماضی میں بھی سخت سزا دی گئی تھی اور ان کی بستیاں اور پوری پوری تہذیبیں تباہ و برباد کردی گئی تھیں۔ مزید یہ کہ فطرت کا قانون یہ ہے کہ عورتیں مردوں کے لیے اور مرد عورتوں کے لیے بنائے گئے ہیں۔ لہذا اس ترتیب کو اسی طرح قائم رہنا چاہیے۔ بصورت دیگر انسانی معاشرے غیر اخلاقی طرز عمل کواخلاقیات کا معیارسمجھنے لگیں گے جس کے نتیجے میں معاشرہ تباہی کی راہ پر گامزن ہو کر ضلالت و گمراہی کا شکار ہوجائےگا۔ یہی وجہ ہے کہ ہم جنس پرستی کو اسلام ایک بہت بڑا جرم گردانتا ہے اور اس کا ارتکاب کرنے والے مجرموں (consensual perpetrators) کو موت کی سزا دی جاتی ہے۔

مجموعی طور پر اسلام، عقل و شعور، علم و آگہی اور منطقی سوچ و طرزِعمل کا دین ہے۔ یہ مؤمن کے ایمان کو اس کی علمی، اخلاقی، جمالیاتی، معاشرتی اور معاشی زندگی سے مربوط کرتاہے۔ قرآن انسانیت کو دعوت دیتا ہے کہ وہ اپنے ذہن کو روح کی گہرائیوں کو کھوجنے، اس کے پوشیدہ حصوں میں روشنی بھرنےاور فطرت کی تلاش کی جستجو کےلیےاستعمال کرے۔¹³³

اسلامی مذہبی اور فکری روایات جو قرآنِ مجید اور احادیث نبویﷺ پر مبنی ہیں دراصل معاشرتی ہم آہنگی کے لیے طرز عمل کی حدود کو منظم کرنے کابنیادی ذریعہ ہیں۔ اسلامی تعلیمات حق اور سچ پر مبنی نظریے اور راستے پر توجہ مرکوزکرنے کی ترغیب دیتی ہیں جو لوگوں کو اپنے خالق سے جوڑتی ہے۔ مزید یہ کہ قرآن و سنت کی ہمہ جہت تعلیمات انسان کے باطنی تزکیہ اور جذبۂ محبت کو اجاگر کرتی ہیں جو پہلے افراد کو متحد کرتی ہے اور پھر ایک پُرامن روشن خیال اور ترقی پسند معاشرے کی تشکیل میں معاون ثابت ہوتی ہے۔ قرآن اور حدیث پر مبنی اسلامی تعلیمات کا محور احکام الٰہی کی پابندی اور معاشرتی ہم آہنگی کے لیےروئیے اور برتاؤ کی حدودمرتب کرناہے۔اسلامی نظام مستند نظریے اور ہدایت پر توجہ مرکوز کرتا ہے جو لوگوں کو اپنے خالق و مالک سے جوڑنے کا واحد ذریعہ ہے۔

• ¹ Syed Hossein Serajzadeh (2002), Islam and Crime the Moral Community of Muslims, Journal of Arabic and Islamic Studies, Lancaster University, Lancaster, U.K., Vol. 4, Pg. 111.
• ² Ali Akbar Jafari and Ahmet Suerdem (2012), An Analysis of Material Consumption Culture in the Muslim World, Sage Journals, London, U.K., Vol. 12, Issue: 1, Pg. 63.
• ³ ابو القاسم علی بن حسن ابن عساکر، تاریخ دمشق، ج-1، مطبوعۃ: دارالفکر للطباعۃ والنشر والتوزیع، بیروت، لبنان، 1995م،ص:40
• ⁴ ابو الفضل احمد بن علی ابن حجر العسقلانی، فتح الباری شرح صحیح البخاری، ج-7، مطبوعۃ: دار المعرفۃ، بیروت، لبنان، 1379ھ، ص: 268
• ⁵ ابو بکر احمد بن علی الجساس الرازی، احکام القرآن، ج-1، دار الاحیاء التراث العربیۃ، بیروت، لبنان، 1405ھ، ص: 249
• ⁶ Thomas D. Jamaluddin (2001), Calendar Conversion Program Used to Analyze Early History of Islam, National Institute of Aeronautics and Space (LAPAN), Bandung, Indonesia, Pg. 1.
• ⁷ Syed Fatima & Naimat U. Khan (2017), Business & Economic Review: Islamic Calendar Anomalies – Evidence from Pakistan, Institute of Management Sciences, Peshawer, Pakistan, Vol. 9, No. 3, Pg. 105.
• ⁸ القرآن، سورۃ التوبۃ 9 :36
• ⁹ ابو عبداللہ محمد بن اسماعیل البخاری ،صحیح البخاری، حدیث : 3197، مطبوعۃ: دارالسلام للنشر والتوزیع، الریاض، السعودیۃ،1999م،ص: 532
• ¹⁰ أبو الفداء إسماعیل ابن کثیر الدمشقی، تفسیر ابن کثیر، ج-4، مطبوعۃ: دارالسلام للنشر والتوزیع، الریاض، السعودیۃ، 2009 م، ص: 146ـ147
• ¹¹ القرآن، سورۃ التوبۃ 9 : 71
• ¹² القرآن، سورۃ الحجرات 49 :13
• ¹³ القرآن، سورۃ النساء 4 :1
• ¹⁴ القرآن، سورۃ الحجرات 49 : 13
• ¹⁵ القرآن، سورۃ الحجرات 49 : 10
• ¹⁶ احمد بن محمد ابو عبداللہ الشیبانی ، المسند احمد بن حنبل، ج-38، مؤسسۃ الرسالۃ، بیروت، لبنان، 2001م،ص: 474
• ¹⁷ القرآن، سورۃ بنی اسرائیل، 17: 6
• ¹⁸ القرآن، سورۃ الکھف 18: 46
• ¹⁹ القرآن، سورۃ بنی اسرائیل، 17: 23
• ²⁰ علامہ غلام رسول سعیدی، تبیان القرآن، ج-6، فرید بک اسٹال، لاہور، پاکستان، 1999ء، ص:691
• ²¹ أبو عبد الله مالک بن أنس المدنی ، موطا امام مالک ، ج -1، مؤسسۃ الرسالۃ، بیروت، لبنان، 1412ھ،ص: 393
• ²² القرآن، سورۃ التحریم 66: 6
• ²³ القرآن، سورۃ الروم 30: 21
• ²⁴ القرآن، سورۃ النور 24: 32
• ²⁵ محمد بن یزید ابو عبداللہ القزوینی، سنن ابن ماجۃ، حدیث: 1845، مطبوعۃ: دارالسلام للنشر والتوزیع، الریاض، السعودیۃ، 2009م، ص: 330
• ²⁶ Hammudah Abdal Ati (1995), The Family Structure in Islam, The American Trust Publications, Chicago, USA, Pg. 20.
• ²⁷ ابن عابدین محمد أمین بن عمر الشامي، رد المحتار علی الدر المختار، ج-4، مطبوعۃ: دار الفکر، بیروت، لبنان،1992م، ص: 378
• ²⁸ امام احمد رضا خان القادری، فتاویٰ رضویہ، ج-13، مطبوعہ: رضا فاؤنڈیشن جامعہ نظامیہ رضویہ، لاہور، پاکستان، 2004ء، ص: 422
• ²⁹ القرآن، سورۃ النساء 4: 34
• ³⁰ مسلم بن الحجاج النیسابوری، صحیح مسلم، حدیث: 2310، مطبوعۃ: دارالسلام للنشر والتوزیع، الریاض، السعودیۃ، 2000م، ص:403
• ³¹ القرآن، سورۃ النساء 4: 35
• ³² القرآن، سورۃ البقرۃ 2: 187
• ³³ سید ابوالاعلی مودودی، اسلامی طرز زندگی،مطبوعہ: کئیر سینٹر فار نیو مسلم ، ریاض ، سعودی عرب1996ء، ص:70
• ³⁴ ابو عبداللہ عبدالرحمن ابو محمد الدارمی، صحیح ابن حبان بترتیب ابن بلبان، ج-9، مؤسسۃ الرسالۃ، بیروت، لبنان، 1993م،ص: 364
• ³⁵ القرآن، سورۃ الفرقان 25: 74
• ³⁶ القرآن، سورۃ النساء 4: 34
• ³⁷ ابو الفضل محمدبن مكرم ابن منظور الافریقی، لسان العرب، ج-12، مطبوعۃ: دار صادر، بیروت، لبنان، 1414ھ، ص:503
• ³⁸ Karim D. Crow (2012), Islam and Civilizational Renewal: In Search of ‘Islamic Lifestyle’, International Institute of Advanced Islamic Studies, Malaysia, Pg. 659.
• ³⁹ القرآن، سورۃ الاحزاب 33 : 70
• ⁴⁰ القرآن، سورۃ آل عمران 3: 173
• ⁴¹ القرآن، سورۃ الاعراف 7: 31
• ⁴² القرآن، سورۃ النساء 4: 135
• ⁴³ القرآن، سورۃ الدہر 76: 8ـ9
• ⁴⁴ القرآن، سورۃ الفرقان 25: 63
• ⁴⁵ القرآن، سورۃ آل عمران 3: 145
• ⁴⁶ القرآن، سورۃ النور 24: 22
• ⁴⁷ القرآن، سورۃ المدثر 74: 4ـ5
• ⁴⁸ القرآن، سورۃ النور 24: 30ـ31
• ⁴⁹ القرآن، سورۃ الاحزاب 33: 35
• ⁵⁰ احمد بن محمد ابو عبداللہ الشیبانی، المسند احمد بن حنبل، ج-5، مؤسسۃ الرسالۃ، بیروت، لبنان، 2001م، ص: 247
• ⁵¹ محمد بن یزید ابو عبداللہ القزوینی، سنن ابن ماجۃ، حدیث: 1903، مطبوعۃ: دارالسلام للنشر والتوزیع، الریاض، السعودیۃ، 2009م، ص: 341
• ⁵² امام احمد رضا خان القادری، فتاویٰ رضویہ، ج-21، مطبوعہ: رضا فاؤنڈیشن جامعہ نظامیہ رضویہ، لاہور، پاکستان، 2004ء، ص: 602
• ⁵³ أبو محمد محمود بن أحمد بد ر الدین العینی، عمدۃ القاری شرح صحیح البخاری، ج-22، مطبوعۃ: دار إحیاء التراث العربی، بیروت، لبنان، (لیس التاریخ موجوداً)، ص: 41
• ⁵⁴ Dr. Abdulaziz Othman Altwaijri (2009), Women in Islam and their Standing in the Muslim Society, The Islamic Educational, Scientific and Cultural Organization, Rabat, Morocco, Pg. 9.
• ⁵⁵ أبو جعفر محمد بن جریر الطبری، جامع البیان فی تأویل القرآن، ج-6، مطبوعۃ: مؤسسۃ الرسالۃ، بیروت، لبنان، 2000م، ص:429
• ⁵⁶ علامہ غلام رسول سعیدی، تبیان القرآن، ج-2،مطبوعہ: فرید بک اسٹال، لاہور، پاکستان، 1999ء، ص: 585
• ⁵⁷ جسٹس پیرمحمد کرم شاہ الازہری ، ضیاء القرآن ، ج-1، مطبوعہ: ضیاء القرآن پبلی کیشنز، لاہور،پاکستان، 2014ء ، ص: 321
• ⁵⁸ القرآن، سورۃ النسآء 4: 7
• ⁵⁹ ابو عبد اللہ محمد بن عمر فخر الدين الرازی، التفسیر الکبیر، ج-12، مطبوعۃ: دار إحیاء التراث العربی، بیروت، لبنان، 1420ھ، ص: 414
• ⁶⁰ القرآن، سورۃ البقرۃ 2: 83
• ⁶¹ مسلم بن الحجاج النیسابوری، صحیح المسلم ، حدیث : 2548، مطبوعۃ: دارالسلام للنشر والتوزیع، الریاض، السعودیۃ، 2000م، ص: 1117
• ⁶² علامہ غلام رسول سعیدی، شرح صحیح مسلم، ج-7،مطبوعہ: فرید بک اسٹال، لاہور، پاکستان، 2003ء، ص: 53
• ⁶³ أبو زکریا یحییٰ بن شرف النووی، المنہاج شرح صحیح مسلم، ج-16، مطبوعۃ: دار إحیاء التراث العربی، بیروت، لبنان، 1392ھ ، ص: 102
• ⁶⁴ ابو عيسي محمد بن عيسي الترمذى، سنن الترمذي، حدیث: 3883، مطبوعۃ: دار السلام للنشر والتوزیع، الریاض، السعودیۃ، 2009م، ص: 1138
• ⁶⁵ مفتی احمد یار خان نعیمی، مرآۃ المناجیح شرح مشکاۃ المصابیح، ج-8،مطبوعہ: مکتبہ اسلامیہ، لاہور، پاکستان، (سن اشاعت ندارد)، ص: 439
• ⁶⁶ ایضاً ،ص: 588
• ⁶⁷ Maulana Wahiduddin Khan (1994), Woman between Islam and Western Society, The Islamic Centre, Delhi, India, Pg. 260.
• ⁶⁸ Dr. Abdulaziz Othman Altwaijri (2009), Women in Islam and their Standing in the Muslim Society, The Islamic Educational, Scientific and Cultural Organization, Rabat, Morocco, Pg. 18.
• ⁶⁹ Will Durant (1950), The Story of Civilization: The Age of Faith, Simon and Schuster, New York, USA, Pg. 180.
• ⁷⁰ Dr. Abdulaziz Othman Altwaijri (2009), Women in Islam and their Standing in the Muslim Society, The Islamic Educational, Scientific and Cultural Organization, Rabat, Morocco, Pg. 19-20.
• ⁷¹ محمد بن عیسیٰ ترمذی، سنن الترمذی، حدیث: 1514، مطبوعۃ: دارالسلام للنشر والتوزیع، الریاض، السعودیۃ، 2009م، ص: 481
• ⁷² ایضاً، حدیث : 1522، ص: 483
• ⁷³ ایضاً، حدیث : 1516،ص: 482
• ⁷⁴ ابو داؤد سلیمان بن اشعث السجستانی، سنن ابی داؤد، حدیث: 356، مطبوعۃ:دار السلام للنشر والتوزیع، الریاض، السعودیۃ، 2009م، ص: 84
• ⁷⁵ أبو محمد محمود بن أحمد بد ر الدین العینی، عمدۃ القاری شرح صحیح البخاری، ج-22، مطبوعۃ: دار إحیاء التراث العربی، بیروت، لبنان، (لیس التاریخ موجوداً)، ص: 45
• ⁷⁶ امام احمد رضا خان القادری، فتاویٰ رضویہ، ج-22، مطبوعہ: رضا فاؤنڈیشن جامعہ نظامیہ رضویہ، لاہور، پاکستان، 2004ء، ص: 680
• ⁷⁷ أبو زکریا یحییٰ بن شرف النووی، المنہاج شرح صحیح مسلم، ج-3، مطبوعۃ: دار إحیاء التراث العربی، بیروت، لبنان، 1392ھ، ص: 148
• ⁷⁸ القرآن، سورۃ البقرۃ 2: 233
• ⁷⁹ القرآن، سورۃ النساء 4: 36
• ⁸⁰ القرآن، سورۃ النسآء4 : 10
• ⁸¹ Annemarie Schimmel (1992), Islam An Introduction, State University of New York Press, New York, USA, Pg. 67.
• ⁸² القرآن، سورۃ محمد 47: 4
• ⁸³ ابو عبداللہ محمد بن اسماعیل البخاری ،صحیح البخاری، حدیث :2227، مطبوعۃ: دارالسلام للنشر والتوزیع، الریاض، السعودیۃ،1999م،ص:355
• ⁸⁴ ابو عبداللہ محمد بن اسماعیل البخاری، صحیح البخاری، حدیث :2545 ، مطبوعۃ: دارالسلام للنشر والتوزیع، الریاض، السعودیۃ،1999 م،ص:411
• ⁸⁵ مسلم بن الحجاج النیسابوری، صحیح مسلم، حدیث: 4317، مطبوعۃ: دارالسلام للنشر والتوزیع، الریاض، السعودیۃ، 2000م، ص:732
• ⁸⁶ A. M. A. Shushtery (2006), Outlines of Islamic Culture, Sh. Muhammad Ashraf Publishers, Lahore, Pakistan, Pg. 486.
• ⁸⁷ القرآن، سورۃ النور 24: 33
• ⁸⁸ سید ابوالاعلی مودودی، اسلامی طرز زندگی،مطبوعہ: کئیر سینٹر فار نیو مسلم ، ریاض ، سعودی عرب1996ء، ص:67-68
• ⁸⁹ A. M. A. Shushtery (2006), Outlines of Islamic Culture, Sh. Muhammad Ashraf Publishers, Lahore, Pakistan, Pg. 486.
• ⁹⁰ القرآن، سورۃ المعارج 70 : 29ـ31
• ⁹¹ ابو عبداللہ محمد بن اسماعیل البخاری ،صحیح البخاری، حدیث :3446 ، مطبوعۃ: دارالسلام للنشر والتوزیع، الریاض، السعودیۃ، 1999م،ص:580
• ⁹² ابو القاسم سلیمان بن احمد الطبرانی، ج-7، المعجم الاوسط، مطبوعۃ: دار الحرمین،القاھرۃ، مصر، (لیس التاریخ موجوداً)، ص: 372
• ⁹³ مسلم بن الحجاج النیسابوری، صحیح مسلم ، حدیث: 2128، مطبوعۃ: دارالسلام للنشر والتوزیع ، الریاض، السعودیۃ، 2000م، ص:981
• ⁹⁴ أبو عبدالرحمن أحمد بن شعیب النسائی، سنن النسائی ،حدیث: 5148، مطبوعۃ: دارالسلام للنشر والتوزیع، الریاض، السعودیۃ، 1999م، ص: 703
• ⁹⁵ ابو عبداللہ محمد بن اسماعیل البخاری، صحیح البخاری، حدیث:5066، مطبوعۃ: دارالسلام للنشر والتوزیع ، الریاض، السعودیۃ، 1999 م،ص:907
• ⁹⁶ محمد بن یزید ابو عبداللہ القزوینی، سنن ابن ماجۃ، حدیث: 1846، مطبوعۃ: دارالسلام للنشر والتوزیع، الریاض، السعودیۃ، 2009م، ص: 330
• ⁹⁷ محمد بن یزید ابو عبداللہ القزوینی، سنن ابن ماجۃ، حدیث: 2096، مطبوعۃ: دارالسلام للنشر والتوزیع ، الریاض، السعودیۃ، 2009م، ص: 422
• ⁹⁸ امام احمد رضا خان القادری، فتاویٰ رضویہ، ج-10، مطبوعہ: رضا فاؤنڈیشن جامعہ نظامیہ رضویہ، لاہور، پاکستان، 2004ء، ص: 494
• ⁹⁹ مفتی محمد امجد علی اعظمی، بہار شریعت، ج-2، مطبوعہ:مکتبہ المدینہ باب المدینہ،کراچی ، پاکستان،1435ھ ، ص: 11
• ¹⁰⁰ ابو القاسم سلیمان بن احمد الطبرانی، المعجم الاوسط ، ج-11، مطبوعۃ: دارالحرمین، القاہرہ، مصر، (لیس التاریخ موجوداً)، ص:155
• ¹⁰¹ القرآن، سورۃ المائدۃ 5:5
• ¹⁰² القرآن، سورۃ النسآء 4: 3
• ¹⁰³ ابو عبداللہ محمد بن اسماعیل البخاری، صحیح البخاری، حدیث:2048، مطبوعۃ: دارالسلام للنشر والتوزیع، الریاض، السعودیۃ، 1999م، ص:328ـ329
• ¹⁰⁴ مسلم بن الحجاج النیسابوری، صحیح مسلم، حدیث: 1428، مطبوعۃ: دارالسلام للنشر والتوزیع ، الریاض، السعودیۃ، 2000م، ص:604
• ¹⁰⁵ Ali Akbar Jafari and Ahmet Suerdem (2012), An Analysis of Material Consumption Culture in the Muslim World, Sage Journals, London, U.K., Vol. 12, Issue: 1, Pg. 70-71.
• ¹⁰⁶ القرآن، سورۃ النساء 4: 23
• ¹⁰⁷ ابو عبداللہ محمد بن اسماعیل البخاری، صحیح البخاری، حدیث :5109، مطبوعۃ: دارالسلام للنشر والتوزیع، الریاض، السعودیۃ،1999 م، ص:914
• ¹⁰⁸ القرآن، سورۃ البقرۃ 2 : 235
• ¹⁰⁹ القرآن، سورۃ البقرۃ 2: 221
• ¹¹⁰ القرآن، سورۃ المائدۃ 5: 5
• ¹¹¹ ابو بکر عبدالرزاق بن ہمام السنانی، المصنف، ج-7 ، المکتب الاسلامی، بیروت، لبنان، 1403ھ، ص: 209
• ¹¹² مفتی امجد علی اعظمی ، بہار شریعت ،ج-2،مطبوعہ :مکتبہ المدینہ، کراچی، پاکستان 1435ھ، ص:110
• ¹¹³ محمد امین الشہیر بابن عابدین ، ردالمختار شرح تنویرالابصار ،ج-4, مطبوعہ دارالکتب العلمیۃ بیروت لبنان ، 2011م، ص:427
• ¹¹⁴ پاکی کے ایام میں۔
• ¹¹⁵ ایسی عورت جس سے صحبت نہیں کی گئی ہو۔
• ¹¹⁶ ایسی عورت جس سے صحبت کی گئی ہو۔
• ¹¹⁷ ایسی عمر جس میں حیض آنا بند ہوجائے۔
• ¹¹⁸ مفتی محمد امجد علی اعظمی، بہار شریعت، ج-2، مطبوعہ:مکتبہ المدینہ باب المدینہ،کراچی ، پاکستان،1435ھ ، ص: 110
• ¹¹⁹ محمد امین الشھیر بابن عابدین، ردالمحتار علی الدر المختار شرح تنویر الابصار، ج-4، مطبوعۃ:دارالکتب العلمیۃ، بیروت، لبنان، 2011م، ص:434- 438
• ¹²⁰ القرآن، سورۃ البقرۃ 2: 231-229
• ¹²¹ ابو داؤد سلیمان بن الاشعث السجستانی،سنن ابی داؤد، حدیث:2178، مطبوعۃ: دارالسلام للنشر والتوزیع، الریاض، السعودیۃ، 2009م، ص:440
• ¹²² علامہ غلام رسول سعیدی، تبیان القرآن، ج-1،مطبوعہ: فرید بک اسٹال، لاہور، پاکستان، 1999ء، ص: 812-813
• ¹²³ ابو عبداللہ محمد بن اسماعیل البخاری ،صحیح البخاری، حدیث : 5273، مطبوعۃ: دارالسلام للنشر والتوزیع، الریاض، السعودیۃ،1999م،ص: 943
• ¹²⁴ علامہ غلام رسول سعیدی، تبیان القرآن، ج-1،مطبوعہ: فرید بک اسٹال، لاہور، پاکستان، 1999ء، ص: 813-814
• ¹²⁵ على بن أبى بكر بن عبد الجليل الفرغانى المرغينانى، الهداية فى شرح بداية المبتدي، ج-2، مطبوعۃ: دار احياء التراث العربي، بیروت، لبنان، (لیس التاریخ موجوداً)، ص:261
• ¹²⁶ محمد بن علی الشوکانی، فتح القدیر، ج-2، مطبوعۃ: دار الکلم، بیروت، لبنان، 1414ھ، ص:201
• ¹²⁷ جسٹس پیرمحمد کرم شاہ الازہری ، ضیاء القرآن ، ج-2، مطبوعہ: ضیاء القرآن پبلی کیشنز، لاہور،پاکستان، 2014ء ، ص: 655-656
• ¹²⁸ القرآن، سورۃ النحل 16: 58ـ59
• ¹²⁹ القرآن، سورۃ الانعام 6: 151
• ¹³⁰ القرآن، سورۃ بنی اسراعیل 17: 31
• ¹³¹ القرآن، سورۃ النور 24: 2
• ¹³² القرآن، سورۃ الشعریٰ 26: 165ـ166
• ¹³³ Authors of IESCO (2007), Cultural Strategy of the Islamic World, Islamic Educational, Scientific and Cultural Organization, Rabat, Morocco, Pg. 84.